গুৱাহাটী, 12 জানুৱাৰী : "বিজেপিৰ আভুৱা ভৰা বাজেট, পাঁচ বছৰীয়া ব্যৰ্থতাৰ দলিল" শীৰ্ষক পুস্তিকা উন্মোচন কৰিলে নিখিল ভাৰত কংগ্ৰেছ কমিটিৰ তত্ত্বাৱধায়ক জিতেন্দ্ৰ সিঙে ৷ স্বামী বিবেকানন্দৰ জন্মজয়ন্তীৰ লগত সংগতি ৰাখি গুৱাহাটী ৰাজীৱ ভৱনত দিনযোৰা কাৰ্যসূচীৰে অনুষ্ঠিত হোৱা এক অনুষ্ঠানত এই পুস্তিকাখন উন্মোচন কৰে নেতা গৰাকীয়ে ৷
উল্লেখ্য যে, বিজেপিৰ পাঁচখন বাজেটৰ ভিতৰত চাৰিখন বাজেটক সাঙুৰি এই পুস্তিকাখন প্ৰকাশ কৰা হৈছে বুলি জানিবলৈ দিছে অসম প্ৰদেশ কংগ্ৰেছৰ কমিতিৰ নেতৃত্বই ৷ ৰাজ্যৰ প্ৰতিটো বুথ কেন্দ্ৰৰ লগতে প্ৰতি ঘৰে ঘৰে এই পুস্তিকাখন বিতৰণ কৰাৰ ব্যৱস্থা কৰিব প্ৰদেশ কংগ্ৰেছে ৷ অনুষ্ঠানত প্ৰদেশ কংগ্ৰেছৰ সভাপতি ৰিপুণ বৰা, সাংসদ প্ৰদ্যৎ বৰদলৈ, আব্দুল খালেকৰ লগতে প্ৰদেশ কংগ্ৰেছৰ কেইবাজনো জেষ্ঠ নেতা উপস্থিত থাকে ৷
অনুষ্ঠাত সাংবাদিক সম্বোধন কৰি প্ৰদেশ কংগ্ৰেছৰ তত্ত্বাৱধায়ক জিতেন্দ্ৰ সিঙৰ কয় “এই পুস্তিকাখনে বিজেপিৰ মিথ্যাচাৰ উদঙাই দিব ৷ বিজেপিৰ ভিজন ডকুমেণ্টক অসমৰ জনসাধাৰণে বিনাশ ডকুমেণ্ট হিচাপে আখ্যা দিছে ৷ অসমৰ জনতাই যুঁজ দি দি নিজৰ ভাষা সংস্কৃতি জীয়াই ৰাখিছে ৷ ইয়াৰ লগতে পাঁচবছৰৰ পিচতহে এতিয়া অসমৰ ভাষা সংস্কৃতিলৈ বিজেপিৰ মনত পৰিল বুলি মন্তব্য প্ৰকাশ কৰে নেতা গৰাকীয়ে ৷
ইয়াৰ সমান্তৰালভাৱে অনুষ্ঠানত কৃষি আইনৰ বিৰোধিতা কৰি ১৬ জানুৱাৰী তাৰিখে অসম প্ৰদেশ কংগ্ৰেছ কমিতিয়ে 'ৰাজভৱন চলো ' এক প্ৰতিবাদী কাৰ্যসূচী গ্ৰহণ কৰিব জানিবলৈ দিছে সভাপতি ৰিপুণ বৰাই ৷
লগতে পঢ়ক : ঋণ দিয়াৰ নামত প্ৰৱঞ্চনাঃ ৰাইজৰ হাতত আবদ্ধ প্ৰৱঞ্চক
