গুৱাহাটী, ১৮ নৱেম্বৰ : সততে বিতৰ্কত থকা বলীউডৰ অভিনেত্ৰী কংগনা ৰাণাৱটৰ (Kangana Ranaut) বিৰুদ্ধে বৃহস্পতিবাৰে দিছপুৰ থানাত এটা গোচৰ ৰুজু কৰে অসম প্ৰদেশ কংগ্ৰেছ কমিটীয়ে (Assam Pradesh Congress Committee) । দেশৰ স্বাধীনতা সংগ্ৰামী সকলৰ লগতে জাতিৰ পিতা মহাত্মা গান্ধী (Mahatma Gandhi) সম্পৰ্কেও বিৰূপ মন্তব্য কৰি দেশজুৰি বিতৰ্কৰ সৃষ্টি কৰিছিল অভিনেত্ৰী গৰাকীয়ে । ভাৰতে ভিক্ষা কৰিহে স্বাধীনতা লাভ কৰিছিল বুলি মন্তব্য কৰাৰ উপৰিও মহাত্মা গান্ধীৰ নাম উল্লেখ নকৰাকৈয়ে পুনৰ মন্তব্য কৰিছিল যে চৰ খাবলৈ ইখন গাল পাতি দিলে ভিক্ষাহে পায় ।
বিজেপিৰ অন্ধ সমৰ্থকৰূপে পৰিচিত কংগনা ৰাণাৱটক শেহতীয়াকৈ পদ্মশ্ৰী সন্মানো (Padma Shri Award) প্ৰদান কৰিছিল । তাৰ পাছতেই অভিনেত্ৰী গৰাকীয়ে এনে ধৰণৰ বিতৰ্কিত মন্তব্য কৰাৰ লগে লগে তেওঁৰ পৰা পদ্মশ্ৰী সন্মান ঘূৰাই ল'বলৈও কংগ্ৰেছে দাবী তুলিছে । দেশজুৰি কংগ্ৰেছে কংগনা ৰাণাৱটৰ বিৰুদ্ধে প্ৰতিবাদ সাব্যস্ত কৰাৰ অংশ স্বৰূপেই বৃহস্পতিবাৰে প্ৰদেশ কংগ্ৰেছে অভেনেত্ৰী গৰাকীৰ গ্ৰেপ্তাৰৰ দাবী তুলি দিছপুৰ থানাত এই এজাহাৰ দাখিল কৰে ।
উল্লেখ্য যে কংগনাই পদ্মশ্ৰী লাভ কৰাৰ পাছতে মোডী চৰকাৰক প্ৰশংসা কৰি কৈছিল যে ২০১৪ চনত নৰেন্দ্ৰ মোডীয়ে (Narendra Modi) প্ৰধানমন্ত্ৰীৰ দায়িত্ব গ্ৰহণ কৰাৰ পাছতহে ভাৰতে প্ৰকৃত স্বাধীনতা লাভ কৰিছিল ৷ ১৯৪৭ চনত দেশে লাভ কৰা স্বাধীনতা আছিল ব্ৰিটিছে দিয়া ভিক্ষা ৷ ইয়াৰ পাছতে মঙলবাৰে পুনৰ জাতিৰ পিতা মহাত্মা গান্ধীক বিতৰ্কৰ মাজলৈ টানি আনিছিল অভিনেত্ৰীগৰাকীয়ে ।
লগতে পঢ়ক :CM in Majuli : ফেৰী দুৰ্ঘটনাত পতিতসকলৰ উদ্ধাৰকাৰী লৈ কৃতজ্ঞতা মুখ্যমন্ত্ৰীৰ
