গুৱাহাটী, ১২ জুলাইঃ অসমৰ বিধানসভা আৰু লোকসভা সমষ্টি পুনৰ নিৰ্দ্ধাৰণ সন্দৰ্ভত এ আই ইউ ডি এফে তৰা এটা গোচৰৰ আধাৰত উচ্চতম ন্যায়ালয়ে কেন্দ্ৰ আৰু ৰাজ্য চৰকাৰ উভয়লৈ জাননী প্ৰেৰণ কৰিছে । সমষ্টি পুনৰ নিৰ্দ্ধাৰণৰ প্ৰক্ৰিয়াটো স্থগিত ৰাখিবলৈ ২০০৮ চনৰ ৮ ফেব্ৰুৱাৰীত জাৰি কৰা জাননীক একাষৰীয়া কৰি চলিত বৰ্ষৰ ২৮ ফেব্ৰুৱাৰীত কেন্দ্ৰীয় চৰকাৰে অসমৰ সমষ্টি পুনৰ নিৰ্দ্ধাৰণৰ নিৰ্দেশ দিছিল । এই নিৰ্দেশক প্ৰত্যাহ্বান জনাই উচ্চতম ন্যায়ালয়ৰ দ্বাৰস্থ হৈছিল এ আই ইউ ডি এফৰ সাধাৰণ সম্পাদক (সাংগঠনিক) অধিবক্তা আমিনুল ইছলাম । সেই গোচৰ সন্দৰ্ভতে মুখ্য ন্যায়াধীশ এছ এ বোবদেৰ নেতৃত্বত গঠিত বিচাৰপীঠে শুনানী গ্ৰহণ কৰি শুকুৰবাৰে ৰাজ্য আৰু কেন্দ্ৰীয় চৰকাৰলৈ জাননী জাৰি কৰে ।
এই সন্দৰ্ভত আমিনুল ইছলামে কয় যে,"কেন্দ্ৰীয় চৰকাৰে লোৱা সমষ্টি পুনৰ নিৰ্দ্ধাৰণৰ সিদ্ধান্তই সংবিধানৰ ১৪, ১৯ আৰু ২১ অনুচ্ছেদৰ অধীনত থকা মৌলিক অধিকাৰ খৰ্ব কৰিছে । তাৰোপৰি প্ৰস্তাৱিত পুনৰ নিৰ্দ্ধাৰণ ২০০১ চনৰ পিয়লৰ ভিত্তিত কৰাৰ কথা কোৱা হৈছে । অথচ অসমত ইতিমধ্যে ২০১১ ৰ পিয়ল সম্পূৰ্ণ হৈছে আৰু ২০২১ ৰ পিয়লৰ প্ৰক্ৰিয়া চলি আছে । জনগাঁঠনিও ২০০১ তকৈ বৰ্তমান সময়ত বহু সলনি হৈছে ।অসমত এই সময়ত সমষ্টি পুনৰ নিৰ্দ্ধাৰণৰ বাবে পৰিস্থিতি অনুকূল নহয় বুলিও তেওঁ মন্তব্য কৰে । ইতিমধ্যে বিষয়টো সন্দৰ্ভত কেন্দ্ৰ আৰু ৰাজ্য উভয় চৰকাৰৰ পৰা উত্তৰ বিচাৰি জাননী জাৰি কৰিছে উচ্চতম ন্যায়ালয়ে ।
লগতে পঢ়কঃচীনৰ ঋণৰ জালৰ কূটনীতি
