গুৱাহাটী, ২৫ জুলাইঃ আগন্তুক বিধানসভা নিৰ্বাচনৰ পৰাই ৰাজনৈতিক ভৱিষ্যৎ অনিশ্চিত হ'ব নেকি অসম গণ পৰিষদৰ তিনি জ্যেষ্ঠ নেতা তথা বিধায়কৰ ? অগপৰ বাহিৰে-ভিতৰে ইয়াক কেন্দ্ৰ কৰি আৰম্ভ হৈছে ব্যাপক চৰ্চা । কিয়নো ইতিমধ্যে বিজেপিৰ সৈতে মিত্ৰতা কৰি নিজৰ আঞ্চলিক চৰিত্ৰ বিসৰ্জন দিয়া অগপই আগন্তুক নিৰ্বাচনত বৰ্তমানে নিজৰ দখলত থকা তিনিটা সমষ্টি ক্ৰমে বঢ়মপুৰ,তেজপুৰ আৰু লখিমপুৰ বিজেপিক এৰি দিব বুলি ৰাজনৈতিক মহলত চৰ্চা আৰম্ভ হৈছে ।
যদিহে প্ৰকৃততে সেয়াই হয় তেন্তে এই তিনিওটা সমষ্টিৰ বৰ্তমানৰ বিধায়কত্ৰয় তথা দলটোৰ তিনি জ্যেষ্ঠ নেতা প্ৰফুল্ল কুমাৰ মহন্ত,বৃন্দাবন গোস্বামী আৰু উৎপল দত্তৰ ৰাজনৈতিক ভৱিষ্যৎ অনিশ্চিত হৈ পৰাটো এক প্ৰকাৰে নিশ্চিত হৈ পৰিব । কিন্তু গুৰুত্বপূৰ্ণ কথাটো হ'ল এই প্ৰসংগ অতি কৌশলেৰে এৰাই চলিছে দলটোৰ সভাপতি অতুল বৰা কিম্বা দলীয় নেতৃত্বই ।
আনহাতে শনিবাৰে এই বিষয়ে বৃন্দাবন গোস্বামী আৰু উৎপল দত্তৰ পৰা মতামত জানিব বিচৰা হৈছিল যদিও দুয়োগৰাকী বিধায়কে এই প্ৰসংগত মন্তব্য কৰাৰ পৰা বিৰত থাকে । কিন্তু এটা কথা ঠিক যে এই তিনি নেতাক অগপ নেতৃত্বই "ৰাজনৈতিক বলি" দিব খোজা ঘটনা নিজৰ নাক কাটি সতিনীৰ যাত্ৰা ভংগ কৰাৰ দৰে হোৱাৰ আশংকাই অধিক ।
