গুৱাহাটী, 26 জুলাই : উত্তৰ-পূৰ্বাঞ্চলৰ বাবে এক সুকীয়া সময় মণ্ডলৰ ধাৰণাটোক হাতে-কামে আগবঢ়াই নিয়াৰ বাবে লাগে চৰকাৰ আৰু নাগৰিক সমাজৰ তৎপৰতা । এই বিষয়ক সমল হিচাপে লৈ বিশিষ্ট সাংবাদিক অদীপ কুমাৰ ফুকনে লিখি উলিয়াইছে তেওঁৰ নৱতম গ্ৰন্থ "সূৰ্যোদয়" । সোমবাৰে গ্ৰন্থখন উন্মোচন কৰে লেখক তথা উদ্যোগী শ্যামকানু মহন্ত, কংগ্ৰেছ নেত্ৰী মীৰা বৰঠাকুৰ আৰু বিশিষ্ট বাৱসায়ী ৰবীন্দ্ৰ দত্তই ।
অনুষ্ঠানটোত গ্ৰন্থাকাৰ অদীপ কুমাৰ ফুকনে কয় যে, মুম্বাইতকৈ ৭৬.২০ মিনিট, দিল্লীতকৈ ৫৭.২৮ মিনিট, হাৰিয়ানাতকৈ ৬৭.৩৫ মিনিট, কলকাতাতকৈ ১৩.২৮ মিনিট আগতে গুৱাহাটীত সূৰ্যোদয় হয় ৷ দেশৰ অৰ্থনৈতিকভাৱে আগবঢ়া দিল্লী, গোৱা, কেৰালা, পঞ্জাৱ, মহাৰাষ্ট্ৰ, তামিলনাডুতকৈ অসমত প্ৰায় এঘণ্টা আগতে সূৰ্যোদয় হয় ৷ উত্তৰ প্ৰদেশৰ মিৰ্জাপুৰৰ ওপৰত ভিত্তি কৰি সৃষ্টি কৰা ভাৰতীয় মান সময় অনুসৰি সেই অঞ্চলসমূহত পুৱা 6 টা বাজিলে অসমতো 6 টা বজাৰ ব্যৱস্থাৰ পৰিৱৰ্তন কৰিব লাগে ৷ প্ৰকৃতাৰ্থত অসমত পুৱা 7 টা বাজে ৷
এই সত্যটো উপলব্ধি কৰি আমি আন ৰাজ্যতকৈ এঘণ্টা আগতে উন্নয়নৰ পথত দৌৰিব লাগে ৷ অসম তথা উত্তৰ-পূৰ্বাঞ্চলৰ বাবে এটা সময় মণ্ডল সৃষ্টি কৰিব লাগে ৷ অন্যথা আমি এঘণ্টা অপচয় কৰিবলগা হৈছে ৷
তেওঁ আঙুলিয়াই দিয়ে যে, 1980 চনত বিজ্ঞান আৰু কাৰিকৰী বিভাগৰ বিশেষজ্ঞই ভাৰতত দুটাতকৈ অধিক সময় মণ্ডলৰ প্ৰয়োজন বুলি গুৰুত্ব দিছিল ৷ 2001 চনত কেন্দ্ৰীয় চৰকাৰে বিজ্ঞান আৰু প্ৰযুক্তি বিভাগৰ মন্ত্ৰীৰ নেতৃত্বত এখন 4 জনীয়া কমিটি গঠন কৰিছিল ৷ সময় মণ্ডলৰ প্ৰসংগত প্ৰতিবেদন প্ৰস্তুত কৰি 2004 চনত কপিল ছিবালে লোকসভাত দাখিল কৰিছিল ৷
তদুপৰি 2014 চনত তদানীন্তন মুখ্যমন্ত্ৰী তৰুণ গগৈয়ে অসম তথা উত্তৰ-পূৰ্বাঞ্চলৰ বাবে বেলেগ এটা সময় মণ্ডলৰ প্ৰস্তাৱ কেন্দ্ৰীয় চৰকাৰক দিছিল ৷ 2017 চনৰ জুনত দেশৰ বিজ্ঞান আৰু প্ৰযুক্তি বিভাগে পুনৰ দুটা সময় মণ্ডলৰ প্ৰসংগত প্ৰস্তাৱ উত্থাপন কৰে ৷ পূৰ্বোত্তৰ ভাৰত সময় মণ্ডলৰ প্ৰসংগ দাঙি ধৰে ৷ 2018 চনত ভাৰতীয় মান সময় তদাৰক কৰা কাউঞ্চিল অৱ ছাইণ্টিফিক এণ্ড ইণ্ডাষ্ট্ৰীয়েল ৰিছাৰ্চ নেচনেল ফিজিকেল লেবৰেটৰীয়ে প্ৰকাশ কৰা এখন গৱেষণা পত্ৰত ভাৰতত দুটা সময় মণ্ডলৰ প্ৰয়োজন উত্থাপন কৰে ৷
এটা IST-I সমগ্ৰ ভাৰতৰ বাবে আৰু IST-II উত্তৰ-পূৰ্বাঞ্চলৰ বাবে ৷ ভাৰতৰ ‘অফিচিয়েল টাইম কীপাৰ’ নেচনেল ফিজিকেল লেবৰেটৰীয়ে উত্তৰ-পূৰ্বাঞ্চলৰ বাবে বিশেষ সময় মণ্ডলৰ দীঘলীয়া দাবীক সমৰ্থন জনাইছিল ৷ এনপিএলে উচিতভাৱে সমৰ্থন জনায় যে অসম, মেঘালয়, নাগালেণ্ড, অৰুণাচল প্ৰদেশ, মণিপুৰ, মিজোৰাম, ত্ৰিপুৰা, আন্দামান আৰু নিকোবৰ দ্বীপপুঞ্জক লৈ এটা সময় মণ্ডল হ’ব পাৰে ৷ অনুষ্ঠানটোত গ্ৰন্থৰ উন্মোচক শামকানু মহন্তই অঞ্চলটোৰ অৰ্থনৈতিক পটভূমিত বিশেষ সময় মণ্ডল যে অপৰিহাৰ্য তাৰ বিষয়ে বিশেষভাৱে আলোকপাত কৰে ।
লগতে পঢ়ক: বেম্বো ইণ্ডাষ্ট্ৰিয়েল পার্কৰ আধাৰশিলা স্থাপন মুখ্যমন্ত্ৰীৰ
