গুৱাহাটী, ২৪ জুন : নতুন চৰকাৰখনৰ জলসম্পদ(water resource) মন্ত্ৰীৰ দায়িত্ব লৈয়ে পীযুষ হাজৰিকা(Piyush Hazarika)ই ৰাজ্যৰ ইমূৰৰ পৰা সিমূৰলৈ ভ্ৰমণ কৰি মথাউৰিৰ অৱস্থাৰ বুজ লৈছে ৷ কিন্তু এতিয়াও বিভাগটোৰ ৫৮ খন আঁচনিৰ কাম অসম্পূৰ্ণ হৈয়ে আছে । বাৰিষাৰ আগে আগে সেইবিলাকৰ মেৰামতিৰ কাম সম্পূৰ্ণ হৈ উঠাৰ কোনো সম্ভাৱনা নাই ।
বিভাগীয়ভাৱে প্ৰাপ্ত তথ্য অনুসৰি, বৰ্তমান মথাউৰি মেৰামতিৰ যিবিলাক কাম চলি আছে সেই সকলোখিনি মাথোঁ ফ্লাড ড্ৰিল আৰু এম এন আৰ শিতানহে । স্বাভাৱিকতে এই দুয়োটা শিতানতে সৰু সৰু আঁচনিৰহে কাম কৰা হয় । পূৰ্বৰ সোণোৱাল চৰকাৰৰ কাৰ্যকালত ২০১৯-২০ বৰ্ষত ৰাজ্য চৰকাৰে এছডিআৰএফ-ৰ ৫৮ খন আঁচনি গ্ৰহণ কৰিছিল । কিন্তু পূৰ্বৰ চৰকাৰ আঁতৰি দিছপুৰত নতুন চৰকাৰ বহিল যদিও এই ৫৮ খন আঁচনিৰ কোনোখনেই আজি পৰ্যন্ত সম্পূৰ্ণ হৈ নুঠিল ।
এই ৫৮ খন আঁচনিৰ অধিকাংশৰে অনাদায় ধন এতিয়ালৈকে চৰকাৰে মোকলাই নিদিলে ৷ যাৰ বাবে এই কামসমূহ অসম্পূৰ্ণ হৈয়ে পৰি ৰ'ল । প্ৰাক্তন মুখ্যমন্ত্ৰী সৰ্বানন্দ সোণোৱাল আৰু প্ৰাক্তন বিত্ত মন্ত্ৰী ডঃ হিমন্ত বিশ্ব শৰ্মাই পূৰ্বৰ চৰকাৰৰ কাৰ্যকালত সৰ্বাধিক গুৰুত্ব আৰোপ কৰিছিল এছডিআৰএফ আৰু এছঅ'পিডি শিতানত ভগ্ন কিম্বা জহি-খহি যোৱা মথাউৰিবোৰ মেৰামতিৰ ক্ষেত্ৰত ।
সেইমৰ্মে এছডিআৰএফ শিতানত ভগ্ন মথাউৰিবোৰ অধিক শক্তিশালী ৰূপত মেৰামতি কৰিবলৈ হাতত লোৱা হৈছিল উক্ত ৫৮ খন আঁচনি । সেই সময়ৰ জলসম্পদ মন্ত্ৰী কেশৱ মহন্তক এই ৫৮ খন আঁচনিৰ কাম খৰতকীয়া কৰিবলৈ তদানীন্তন বিত্তমন্ত্ৰী ডঃ শৰ্মাই কেইবাবাৰো সোঁৱৰাই দিছিল । এই ৫৮ খন আঁচনিৰ অধিকাংশতে জিঅ' বেগ ব্যৱহাৰ কৰিবলগীয়া আছিল ।
কিন্তু বিগত বৰ্ষত সেই সময়তে লক ডাউন আৰম্ভ হোৱাত নয়দা আৰু গুজৰাটৰ পৰা জিঅ' বেগ আহি অসম পাবলৈ যথেষ্ঠ পলম হয় । যাৰ বাবে সমগ্ৰ প্ৰক্ৰিয়াটোৱেই পিছপৰি ৰয় । পৰৱৰ্তী সময়ত এই কাম পুনৰ আৰম্ভ হয় যদিও পৰ্যাপ্ত পুঁজিৰ অভাৱত মন্থৰ গতিত কাম আগবাঢ়িবলৈ আৰম্ভ কৰে । যাৰ ফলস্বৰূপে এতিয়া বাৰিষা সমাগত যদিও এই বাৰিষাৰ আগে আগে এই কাম সম্পূৰ্ণ হৈ উঠাৰ কোনো সম্ভাৱনা নাই ।
লগতে পঢ়ক: উত্তৰ প্ৰদেশ পালেগৈ শ্ব'হাম শ্বপিৰ স্বত্বাধিকাৰী সন্দীপ জালান
