গুৱাহাটী, 9 অক্টোবৰ : নতুন দিল্লীত অনুষ্ঠিত হ’বলগীয়া 2024 বৰ্ষৰ গণৰাজ্য দিৱসৰ পেৰেডৰ কাৰ্যসূচীত ব্ৰাছ বেণ্ডত উত্তৰ-পূব মণ্ডলক প্ৰথমবাৰৰ বাবে প্ৰতিনিধিত্ব কৰিব ৰাষ্ট্ৰীয় শিক্ষাৰ্থী বাহিনী চমুকৈ NCC ৰ গুৱাহাটী আৰু নাগালেণ্ডৰ কহিমাৰ 50 গৰাকী গাৰ্লছ কেডেটে । ইয়াৰে 25 গৰাকী কেডেট এন চি চিৰ গুৱাহাটী গ্ৰুপৰ প্ৰথম এন চি চি বেটেলিয়ানৰ জুনিয়ৰ উইঙৰ অন্তৰ্গত গুৱাহাটীৰ পাথৰকুঁৱৰীৰ ছেণ্ট ফ্ৰান্সিছ স্কুলৰ ছাত্ৰী তথা গাৰ্লছ কেডেটে । ছেইণ্ট ফ্ৰান্সিছ বিদ্যালয়ৰ 13 ৰ পৰা 15 বছৰ বয়সৰ এই 25 গৰাকী NCC জুনিয়ৰ উইঙৰ গাৰ্লছ কেডেটে নতুন দিল্লীত 2024 চনৰ গণৰাজ্য দিৱস শিবিৰত মাৰ্চপাৰ্ছত ভাগ লোৱাৰ বাবে নিৰ্বাচিত হৈছে ।
তেনেদৰে বাকী 25 গৰাকী কেডেট হ’ল এনচিচিৰ কহিমা গ্ৰুপৰ অন্তৰ্গত কহিমাস্থিত প্ৰথম নাগালেণ্ড গাৰ্লছ NCC বেটেলিয়ানৰ কেডেট তথা কহিমাৰ ছেইণ্ট মেৰীজ কেথেড্ৰেল হায়াৰ চেকেণ্ডেৰী বিদ্যালয়ৰ 13 ৰ পৰা 15 বছৰ বয়সৰ ছাত্ৰী । উত্তৰ-পূব মণ্ডল সঞ্চালকালয়ৰ এই 50 গৰাকী গাৰ্লছ কেডেটে প্ৰথমবাৰৰ বাবে উত্তৰ-পূব মণ্ডল সঞ্চালকালয়ক নতুন দিল্লীত ব্রাছ বেণ্ডত প্ৰতিনিধিত্ব কৰিব ।
