যোৰহাট, 19 মাৰ্চঃ চৰম নিৰাপত্তাহীনতাত এতিয়া ভুগিছে যোৰহাটৰ টিমটিমিয়া গাঁৱবাসী ৷ বিগত ১৫মাৰ্চৰ নিশা পশ্চিম যোৰহাটৰ টিমটিমিয়া গাঁৱৰ মৃদুল দাস নামৰ এজন লোকে একে গাঁৱৰ দণ্ডীৰাম নামৰ এজন লোকক চোকা অস্ত্ৰৰে আঘাত কৰে । ফলত লোকজনক সংকটজনক অৱস্থাত যোৰহাট চিকিৎসা মহাবিদ্যালয়ত ভৰ্তি কৰোৱা হয় ৷ তদুপৰি মৃদুল নামৰ লোকজনে গাঁৱখনৰ ৰাইজক চোকা অস্ত্ৰ আৰু পিষ্টল দেখুৱাই ভাবুকি প্ৰদান কৰে ৷ ইয়াৰ পিছত ঘটনা সন্দৰ্ভত পুলিবৰ আৰক্ষীয়ে দুৰ্বল স্থিতি গ্ৰহণ কৰে ৷ ইতিমধ্যে গাঁৱৰ ৰাইজে জিলাখনৰ আৰক্ষী অধীক্ষক গৰাকীক সমগ্র ঘটনা সম্পৰ্কত লিখিত অভিযোগ দাখিল কৰাৰ পাছত আৰক্ষী অধীক্ষকৰ নিৰ্দেশত মৃদুল দাসক আটক কৰিছিল আৰক্ষীয়ে ৷
আনহাতে,নগদ ধনৰ বিনিময়ত অভিযুক্তৰ ধাৰা শিথিল কৰাৰ লগতে মুকলি হোৱাৰ সুযোগ প্ৰদান কৰাত ক্ষোভিত হৈ পৰিছে গাঁৱবাসী ৷ সেয়ে বুধবাৰে পুনৰ উপায়ুক্তৰ কাৰ্যালয়ৰ সন্মুখত প্ৰতিবাদী কাৰ্যসূচী গ্ৰহণ কৰে গাঁৱবাসীয়ে ৷ গাঁৱবাসীৰ দাবী অভিযুক্ত মৃদুল দাসৰ বিৰুদ্ধে এক কঠোৰ স্থিতি গ্ৰহণ কৰি আৰক্ষীয়ে শাস্তি প্ৰদান কৰক । অন্যথা টিমটিমিয়া গাঁৱত সংঘটিত হ’ব পাৰে ভয়ংকৰ ঘটনা ৷
লগতে চাওকঃ কৰ’ণা ভাইৰাছক লৈ কিমান সজাগ ৰাইজ ?
