যোৰহাট, 3 ফেব্ৰুৱাৰীঃ যোৰহাট চহৰৰ নিমাতী ঘাটত বিদেশী পৰ্যটকৰ মৃত্যু ৷ 31 জানুৱাৰীৰ পুৱাই চৰাইদেউ নামৰ পৰ্যটক ফেৰীখনত উদ্ধাৰ হয় গ্ৰেট ব্ৰিটেইনৰ নিউকেচলৰ ৮৩ বছৰীয়া এলিষ্টাৰ নীল মেকডনাল্ডৰ মৃতদেহ ৷ মাজুলী ভ্ৰমণলৈ আহিছিল পৰ্যটকগৰাকী ৷ বাৰ্ধক্যজনিত কাৰণতেই লোকজনে হঠাৎ মৃত্যুক আঁকোৱালি লোৱাৰ সন্দেহ সহযোগী তথা স্থানীয় লোকৰ ৷
কিন্তু নীল মেকডনাল্ডৰ মৃতদেহকলৈ এতিয়া বিমোৰত পৰিছে যোৰহাট চিকিৎসা মহাবিদ্যালয় কৰ্তৃপক্ষ ৷ কিয়নো মেকডনাল্ডৰ মৃতদেহ চমজি ল’বৰ বাবে কোনো লোক নথকাত বৰ্তমানেও মৰণোত্তৰ পৰীক্ষা কৰিব পৰা হোৱা নাই মৃত লোকজনৰ ৷ আনহাতে যোৰহাট চিকিৎসা মহাবিদ্যালয়ত অভাৱ মৃতদেহ ৰখাৰ বাবে উপযুক্ত ক'ল্ড ষ্ট'ৰেজ (শীত তাপ)ৰূমৰ ৷ যিটো ক'ল্ড ষ্ট'ৰেজ আছে তাৰো এয়াৰ কুলাৰ বিকল হৈ থকাত সেইয়া থকা নথকা প্ৰায় সমান হৈছে ৷
এতিয়া ৰাজ্যৰ এখন অগ্ৰণী জিলাত অৱস্থিত চিকিৎসা মহাবিদ্যালয়ৰ এনে পুতৌলগা অৱস্থাই বাৰে বাৰে ভেঙুচালি কৰিছে কাগজে-কলমে অত্যাধুনিক অসমৰ স্বাস্থ্য খণ্ডক ৷
এতিয়া প্ৰশ্ন উত্থাপন হৈছে মঞ্চত ভাষণ দি গগন কঁপোৱা স্বাস্থ্য মন্ত্ৰীগৰাকীয়ে উন্নত পৰ্যায়লৈ লৈ যাব পাৰিব নে সঘনাই বিতৰ্কত সোমাই পৰা যোৰহাট চিকিৎসা মহাবিদ্যালয়খনক সেইয়া হে লক্ষ্যণীয় হ’ব ৷
- লগতে চাওক- নুমলীগড়ত প্ৰকৃতিৰ অনুপম উপহাৰ
