টীয়ক,22 মাৰ্চ: বিধানসভা নিৰ্বাচনৰ প্ৰথম পৰ্যায়ৰ ভোট গ্ৰহণৰ বাবে মাজত মাথো চাৰিটা দিন বাকী থকা অৱস্থাতে অধিক তৎপৰতা বৃদ্ধি পাইছে প্ৰাৰ্থী তথা ৰাজনৈতিক নেতাসকলৰ মাজত ৷ আন আন সমষ্টিসমূহৰ দৰে টীয়ক সমষ্টিত বৃদ্ধি পাইছে নিৰ্বাচনী তৎপৰতা ৷ সোমবাৰে সমষ্টিটোৰ বিজেপি নেতৃত্বধীন মিত্ৰজোঁটৰ প্ৰাৰ্থী ৰেণুপমা ৰাজখোৱাই প্ৰচাৰ চলাই বানে গৰকা জাঁজীমুখত ৷ মিত্ৰজোঁটৰ আন এক অন্যতম অংশীদাৰী দল গণশক্তি দলৰ প্ৰতিনিধিসকলে সভাত উপস্থিত থাকি মিত্ৰতালৈ সন্মান জনাই সম্পূৰ্ণ সহযোগিতা আগবঢ়াব বুলি প্ৰাৰ্থীগৰাকীক প্ৰতিশ্ৰুতি দিয়ে ।
উল্লেখ্য যে, এই সভাতে সমষ্টিটোৰ অৰ্ধ শতাধিক কংগ্ৰেছী নেতা-পালিনেতাই আনুষ্ঠানিকভাৱে অগপ দলত যোগদান কৰে ৷ জাঁজীমুখৰ বজাৰ গৃহত অনুষ্ঠিত এই সভালৈ প্ৰাৰ্থীগৰাকীক তিনিওটা দলৰ সমৰ্থকসকলে এক ৰেলীৰে আদৰি অনাৰ লগতে বিজেপিৰ কেইবাগৰাকীও ৰাজ্যিক তথা জিলা পৰ্যায়ৰ বিষয়ববীয়া উপস্থিত থাকে ৷
