টীয়ক,19এপ্ৰিল: যোৰহাট জিলাৰ টীয়ক ৰাজহ চক্ৰৰ অধীনৰ বলমা ন-হাত টিপমিয়াত ন্যস্তস্বাৰ্থ জড়িত এজন লোকে লোকে এটা বৃহৎ নলা খান্দি টীয়ক নৈৰ স্বাভাৱিক গতি পথ সলনি কৰি বোৱাই নিয়াৰ অভিযোগ উৎথাপন কৰিছে স্থানীয় ৰাইজে । অভিযোগ অনুসৰি লোকজনে নিজ ভূমি সুৰক্ষিত কৰাৰ স্বাৰ্থত কাষেদি বৈ অহা টীয়ক নৈ অন্য দিশে বোৱাই নিবৰ বাবে এটি বৃহৎ নলা খনন কৰে । ফলত কাষৰীয়া কৃষিভূমিসমূহ ব্যাপক ক্ষতিগ্ৰস্ত হোৱাৰ লগতে বানৰ ভয়াৱহতাৰ আশংকা ভুগিছে কাষৰীয়া কেইবাখনো গাঁৱৰ ৰাইজে ।
কিয়নো প্ৰত্যেক বছৰে টীয়ক নৈৰ বাঢ়নী পানীয়ে কাষৰীয়া গাঁওকেইখনৰ জনজীৱন দুৰ্বিষহ কৰি আহিছে । এই সমগ্ৰ ঘটনা সন্দৰ্ভত জাতীয়তাবাদী যুৱ ছাত্ৰ পৰিষদ টীয়ক আঞ্চলিক সমিতিয়ে তীব্ৰ প্ৰতিক্ৰিয়া প্ৰকাশ কৰি প্ৰশাসনে দৃঢ় পদক্ষেপ গ্ৰহণৰ দাবী জনাই চক্ৰ বিষয়াক এক স্মাৰক পত্ৰ প্ৰদান কৰে ৷
ইপিনে এই অবৈধ কাৰ্যৰ বিৰুদ্ধে চক্ৰ বিষয়াই তৎপৰতা গ্ৰহণ কৰি অবৈধভাৱে খনন কৰা নলা পোতাৰ নিৰ্দেশ দিয়াত নলাটো পোতাৰ কাম আৰম্ভ কৰিছে বুলি জানিব পৰা গৈছে।
