টীয়ক, ২৯ ডিচেম্বৰ: যোৰহাটৰ টীয়কত পুনৰ মাইক্ৰ'ফাইনেন্স কোম্পানীৰ শোষণৰ বিৰোধিতাৰে ৰাজপথলৈ ওলাই আহিল ৩টাকৈ সংগঠনৰ সদস্য । মঙলবাৰে সদৌ অসম চাহ জনগোষ্ঠী অধিকাৰ সংগ্ৰাম সমিতি, সন্মিলিত নাৰী অধিকাৰ সংগ্ৰাম সমিতি, মাইক্ৰ'ফাইনেন্স শোষণ বিৰোধী যৌথ সংগ্ৰামী মঞ্চ আৰু বিভিন্ন দল সংগঠনৰ সহযোগত টীয়কৰ নগৰৰ মাজমজিয়াত 'গণ হুংকাৰ প্ৰতিবাদ' শীৰ্ষক এক প্ৰতিবাদী সমদল উলিওৱা হয় ।
মাইক্ৰ'ফাইনেন্স কোম্পানী বন্ধ কৰক, নহ'লে আমাক মাৰি পেলাওক, কৃষক নেতা অখিল গগৈক অনতি পলমে মুক্তি দিয়ক, লগতে 'কা' আমি নামানো আদি বিভিন্ন শ্ল'গানেৰে টীয়কৰ ৰাজপথ উত্তাল কৰি তোলে প্ৰতিবাদকাৰীয়ে । তাৰোপৰি কেইবাটাও দাবী সম্বলিত এখন স্মাৰক পত্ৰ টীয়ক ৰাজহ চক্ৰৰ জৰিয়তে চৰকাৰলৈ প্ৰেৰণ কৰে । দীৰ্ঘদিন ধৰি প্ৰতিবাদ কৰি অহাৰ পাছতো চৰকাৰে কোনো গুৰুত্ব প্ৰদান নকৰাত ক্ষোভিত হৈ পৰিছে প্ৰতিবাদকাৰীসকল ।
সেয়ে, শীঘ্ৰে ইয়াৰ উচিত ব্যৱস্থা নকৰিলে অহা বিধানসভা নিৰ্বাচনত যোগ্য প্ৰত্যুত্তৰ দিব বুলি হুংকাৰ দিয়ে সংগঠনকেইটাই । আনহাতে, মাইক্ৰ'ফাইনেন্স কোম্পানীৰ বিৰুদ্ধে প্ৰতিবাদ এয়াই প্ৰথম নহয় । ইয়াৰ পূৰ্বেও ৰাজ্যৰ ভিন্ন প্ৰান্তত মাইক্ৰ'ফাইনেন্স কোম্পানীয়ে ঋণ আদায়ৰ নামত দৰিদ্ৰ ৰাইজক শোষণ কৰাৰ অভিযোগ উত্থাপন হৈ আহিছে । এতিয়া ৰাইজৰ বৰম্বাৰ প্ৰতিবাদৰ পিছত চৰকাৰে মাইক্ৰ'ফাইনেন্স কোম্পানীৰ বিৰুদ্ধে কি ব্যৱস্থা গ্ৰহণ কৰে সেয়া লক্ষণীয় হ'ব ।
লগতে পঢ়ক:ব্ৰহ্মপুত্ৰৰ বুকুত নৌকা বিহাৰ আমেৰিকা যুক্তৰাষ্ট্ৰৰ ৰাষ্ট্ৰদূতৰ
