টীয়ক, 4 জুন : কালৰূপী ক'ৰণাৰ সংক্ৰমণ ৰুধিবলৈ ৰাজ্য চৰকাৰে বিভিন্ন ব্যৱস্থা গ্ৰহণ কৰিছে ৷ এনে পৰিস্থিতিৰ সৈতে যুঁজ দিবলৈ মুখ্যমন্ত্ৰী শৰ্মাই মুখ্যমন্ত্ৰীৰ সাহাৰ্য পুঁজিলৈ অনুদানৰ বাবে ৰাইজক আহ্বান জনাইছিল ৷ এই আহ্বানৰ প্ৰতি সহাৰি জনাই চৰকাৰলৈ সহায়ৰ হাত আগবঢ়ালে যোৰহাটৰ ঐতিহাসিক ঢেকীয়াখোৱা বৰনামঘৰ কৰ্তৃপক্ষই ।
এই জটিল ক্ষণত ক'ভিড আক্ৰান্ত সকলক সেৱা আগবঢ়োৱাৰ ক্ষেত্ৰত চৰকাৰৰ আংশিক সহায় হোৱাকৈ ঢেকীয়াখোৱা বৰনামঘৰ কৰ্তৃপক্ষই মুখ্যমন্ত্ৰীৰ সাহাৰ্য পুঁজিলৈ আগবঢ়ালে পঞ্চাশ হাজাৰ এটকা । ইয়াৰ লগতে জৰুৰীকালীন সেৱাত নিয়োজিত হৈ থকা প্ৰতিজন লোক আৰু ক'ভিড আক্ৰান্ত সকললৈ নামঘৰৰ অক্ষয় বন্তিৰ তৰফৰ পৰা আৰ্শীবাদ প্ৰদান কৰে ।
আনহাতে, বৰেণ্য সাহিত্যিক, অসম সাহিত্য সভাৰ প্ৰাক্তন সভাপতি লক্ষীনন্দন বৰাৰ মৃত্যুত গভীৰ শোক প্ৰকাশ কৰিছে ঢেকীয়াখোৱা বৰনামঘৰ কৰ্তৃপক্ষই । ২০১৪ চনত ঢেকীয়াখোৱা বৰনামঘৰে প্ৰৱৰ্তন কৰা শ্ৰীশ্ৰী মাধৱদেৱ বঁটা আগবঢ়াইছিল প্ৰয়াত সাহিত্যিক গৰাকীলৈ । তেখেতৰ বিয়োগত শুকুৰবাৰে নামঘৰৰ পৰিচালনা সমিতিয়ে নামঘৰ প্ৰাংগণত শোকসভা পাতি পৰিয়ালবৰ্গলৈ এটি শোক প্ৰস্তাৱ প্ৰেৰণ কৰে ।
লগতে পঢ়ক : উভতি নহাৰ বাটেৰে গ’লগৈ পাতাল ভৈৰৱীৰ স্ৰষ্টা ড৹ লক্ষ্মীনন্দন বৰা
