যোৰহাট, 30 জুলাইঃ যোৰহাটৰ আৱৰ্ত ভৱনত সংবাদমেল আয়োজন কৰি বিভিন্ন বিষয়ক লৈ বিজেপি চৰকাৰৰ বিৰুদ্ধে সৰৱ হৈ পৰে অসমৰ প্ৰাক্তন মুখ্যমন্ত্ৰী তথা অগপৰ জেষ্ঠ নেতা প্ৰফুল্ল কুমাৰ মহন্ত ৷ প্ৰাক্তন মুখ্যমন্ত্ৰী গৰাকীয়ে অখিল গগৈৰ কাৰাবন্দীত্বৰ পৰা আৰম্ভ কৰি বাক স্বাধীনতা খৰ্ব,কৰ’ণা ভাইৰাছৰ প্ৰসংগ আদি বিভিন্ন বিষয়ক সামৰি লৈ বিজেপি চৰকাৰক সমালোচনা কৰে ৷
অখিল গগৈৰ প্ৰসংগত মহন্তই কয় যে,কল্পনাপ্ৰসূতভাৱে এটাৰ পাচত এটা গোচৰ জাপি দি অখিল গগৈৰ দৰে নেতাক ৰাজনৈতিক বন্দী কৰি ৰখাটো উচিত হোৱা নাই ৷ ইয়াৰ উত্তৰ কেৱল বিজেপি চৰকাৰেহে দিব পাৰিব ৷ আনহাতে কেন্দ্ৰত আঞ্চলিক দলৰ সহায় অবিহনে কোনো দলেই চৰকাৰ বনাব নোৱাৰে বুলি তেওঁ প্ৰকাশ কৰি অসমত আঞ্চলিক দলৰ ভেটি শক্তিশালী কৰাৰ প্ৰয়োজন বুলি কয় ৷
অনাগত দিনত অসম গণ পৰিষদে সৰু সৰু আঞ্চলিক দলৰ সৈতে একগোট হৈ কাম কৰি যাব বুলি উল্লেখ কৰে প্ৰাক্তন মুখ্যমন্ত্ৰী গৰাকীয়ে ৷
আনহাতে কেন্দ্ৰত বিজেপি আৰু ৰাজ্যতো বিজেপি চৰকাৰ থকাৰ পাচতো যি ধৰণে কাম কৰিব লাগিছিল সেই ধৰণে কাম কৰিব পৰা নাই বুলি প্ৰাক্তন মুখ্যমন্ত্ৰী গৰাকীয়ে উল্লেখ কৰে ৷
ইপিনে তেওঁ বিজেপি চৰকাৰে বাক স্বাধীনতাৰ অধিকাৰ খৰ্ব কৰা বুলি চৰকাৰক সমালোচনা কৰে ৷ তেওঁ কৰ’ণা সম্পৰ্কেও সংবামেলত উল্লেখ কৰে ৷
লগতে পঢ়কঃ ৰাইজৰ প্ৰশ্ন বাণত বিপাঙত পৰিল সৰুপথাৰৰ বিধায়িকা ৰ'জলিনা তিৰ্কী
