টীয়ক, 23 ফেব্ৰুৱাৰীঃ টীয়কৰ চটাই ঘৰফলীয়াত নিশা সংঘটিত হয় চাঞ্চল্যকৰ হত্যাকাণ্ড। পৰাগ চাংমাই গগৈ নামৰ এজন যুবকক মৰিয়াই হত্যা কৰাৰ অভিযোগ উত্থাপন হৈছে প্ৰভাত গগৈ আৰু গৌতম গগৈ নামৰ দুজন যুৱকৰ বিৰুদ্ধে ৷ ঘটনা সন্দৰ্ভত মৃত ব্যক্তিজনৰ পত্নীৰ ভাষ্য অনুসৰি, দুদিন পূৰ্বে কোনো কাৰণত বিবাদৰ সূত্ৰপাত হৈ প্ৰভাত আৰু গৌতমে পৰাগৰ পিতৃক মাৰ-পিত কৰে ৷ ফলত পৰিয়ালটোৱে লাহদৈগড় আৰক্ষী চকীত এজাহাৰ দাখিল কৰিছিল যদিও আৰক্ষীয়ে 2 হাজাৰ টকা নিদিলে অভিযুক্তক কৰায়ত্ব নকৰে বুলি ভূক্তভোগী পৰিয়ালটোক থানাৰ পৰা পঠিয়াই দিয়ে ।
লগতে পঢ়কঃ ক’ৰোণা ভাইৰাছৰ সংহাৰঃ চীনত মৃত্যুৰ সংখ্যা 2,386 লৈ বৃদ্ধি
আৰক্ষীৰ এই কাণ্ডৰ পাছতে নিশা পৰাগৰ ঘৰৰ সন্মুখতে কুঠাৰ আৰু দাৰে উপৰ্যুপৰি পৰাগক প্ৰহাৰ কৰি যুৱকদ্বয় পলায়ন কৰে । সম্প্ৰতি প্ৰভাতক আৰক্ষীয়ে গ্ৰেপ্তাৰ কৰিবলৈ সক্ষম হৈছে যদিও আনজন পলাতক অৱস্থাত আছে । আৰক্ষীয়ে ইতিমধ্যে পৰাগ চাংমাই গগৈৰ মৃতদেহ মৰোণোত্তৰ পৰীক্ষা বাবে নিশাই যোৰহাট চিকিৎসা মহাবিদ্যালয়লৈ প্ৰেৰণ কৰে । উক্ত ঘটনা সন্দৰ্ভত তদন্ত অব্যাহত ৰাখিছে আৰক্ষীয়ে ৷
