যোৰহাট,17 ছেপ্টেম্বৰঃ সোমবাৰে নিশা যোৰহাট চহৰৰ সোঁমাজত অবৈধ সুৰা বেপাৰীৰ হাতত নিহত হয় আশীষ বৰা নামৰ এজন যুৱক ৷ সুৰাৰ ঘাটি উচ্ছেদ কৰিবলৈ যোৱা যুৱকজনৰ মৃত্যুৰ পাছত চহৰখনত সৃষ্টি হয় উত্তেজনাময় পৰিস্থিতিৰ ৷ সুৰাৰ দোকান বন্ধ কৰিবলৈ যোৱাৰ বাবে সুৰা ব্যৱসায়ীৰ ৰোষত পৰিছিল যুৱকজন ৷ এই ঘটনাক লৈ সুৰা ব্যৱসায়ীজনৰ লগতে তেঁওৰ পুত্ৰই বেয়াকৈ প্ৰহাৰ কৰে আশীষ বৰাক ৷ ব্যৱসায়ী আৰু পুত্ৰজনৰ আক্ৰমণত যুৱকজনে মূৰ আৰু বুকুত গুৰুতৰভাৱে আঘাত পাইছিল। ইয়াৰ পিছতে যুৱকজনক সংকটজনক অৱস্থাত যোৰহাট চিকিৎসা মহাবিদ্যালয়ত ভৰ্তি কৰোৱা হয় যদিও যুৱকজনৰ চিকিৎসালয়তেই মৃত্যু ঘটে ৷ ইতিমধ্যে ঘটনা সম্পৰ্কত যোৰহাট আৰক্ষীয়ে আটক কৰিছিল বগাই নামৰ এটা সুৰা ব্যৱসায়ীক।
ইফালে স্থানীয় লোকে অবৈধ সুৰাৰ দোকান সমূহ বন্ধ কৰা লগতে সম্পূৰ্ণ ভাৱে উচ্ছেদৰ দাবী উত্থাপন কৰি পৰিৱেশ উত্তাল কৰি ৰাখিছিল সমগ্ৰ দিনটো। যাৰ ফলত যোৰহাট জিলা প্ৰসাশনে আৰক্ষীৰ সহযোগত ৬ খনকৈ দোকান ছীল কৰি দিয়াৰ পাছতহে পৰিৱেশ শান্ত হয়।যোৰহাট আৰক্ষীৰ উচ্চ পদস্থ বিষয়াই জনোৱা মতে, ইতিমধ্যে হত্যাকাণ্ডৰ লগত জড়িত প্ৰকৃত দোষী চিন্টু দাসক পুলিবৰৰ পৰা যোৰহাট আৰক্ষীয়ে গ্ৰেপ্তাৰ কৰিবলৈ সক্ষম হৈছে।
