যোৰহাট, ২০ নৱেম্বৰ: আৰক্ষীৰ অকৰ্থ্য নিৰ্যাতনৰ পাচত ছ'চিয়েল মিডিয়াত সমগ্ৰ ঘটনা বিৱৰি চৰমপন্থা বাছি লোৱা দেৰগাঁও দ’লমুখৰ অজয় দত্তৰ পৰিয়ালৰ লোক আজিও ন্যায়ৰ অপেক্ষাত আছে ৷ যুৱকজনৰ মৃত্যুৰ পাচত মুখ্যমন্ত্ৰী হিমন্ত বিশ্ব শৰ্মাৰ সমগ্ৰ ঘটনাৰ উচিত তদন্তৰ নিৰ্দেশ দিয়ে ৷ মুখ্যমন্ত্ৰীৰ নিৰ্দেশৰ পাচতেই কঠোৰ হৈছিল আৰক্ষী সঞ্চালক প্ৰধান জি পি সিং তথা অসম আৰক্ষীৰ গৃহ বিভাগ । আৰক্ষী প্ৰধানৰ নিৰ্দেশৰ পিচত ঘটনা সন্দৰ্ভত তদন্ত আৰম্ভ কৰি দোষীক উচিত শাস্তি প্ৰদানৰ প্ৰতিশ্ৰুতি দিছিল গোলাঘাট আৰক্ষী অধীক্ষক ৰাজেন সিঙে ৷
ইয়াৰ পাচতেই গোলাঘাট আৰক্ষী অধীক্ষক ৰাজেন সিঙে প্ৰয়াত অজয় দত্তৰ বাসগৃহত উপস্থিত হৈ দোষীক উচিত শাস্তি প্ৰদানৰ প্ৰতিশ্ৰুতি দিছিল যদিও আজিকোপতি উক্ত প্ৰতিশ্ৰুতি ৰক্ষা নকৰিলে অসম আৰক্ষীৰ গৃহ বিভাগে । ইফালে উক্ত ঘটনা সন্দৰ্ভত ৰাষ্ট্ৰীয় মানৱ অধিকাৰ সংগ্ৰাম সমিতিয়ে ৰাষ্ট্ৰীয় মানৱ অধিকাৰ আয়োগত তৰিছিল গোচৰ । ঘটনা সন্দৰ্ভত দেৰগাঁও আৰক্ষী থানা যান-বাহন নিয়ন্ত্ৰণ শাখা আৰক্ষী কনিষ্টবল আৰু এজন আৰক্ষী বাহন চালকৰ নাম সাঙোৰ খাইছিল যদিও আজিকোপতি কোনোধৰণৰ শাস্তিমূলক ব্যৱস্থা গ্ৰহণ নকৰাত ক্ষোভ পৰিয়ালৰ আৰু ৰাষ্ট্ৰীয় মানৱ অধিকাৰ সংগ্ৰাম সমিতিৰ ।
কিন্তু মুখ্যমন্ত্ৰীৰ নিৰ্দেশক দেৰগাঁও আৰক্ষীয়ে কোনো গুৰুত্ব নিদিয়া অভিযোগ উত্থাপিত কৰিছে মৃত অজয় দত্তৰ দুৰ্ভগীয়া মাতৃয়ে ৷ মৃত পুত্ৰৰ শোকত এতিয়া মাথোঁ উচুপি উচুপি কান্দি কেৱল ন্যায় বিচাৰিছে অজয়ৰ মাতৃয়ে ৷ দুৰ্ভগীয়া মাতৃগৰাকীৰ অভিযোগ, এই ঘটনা সন্দৰ্ভত কোনো ধৰণৰ গুৰুত্ব প্ৰদান কৰা নাই আৰক্ষীয়ে ৷ অজয় দত্তই ন্যায় নাপালে আৰক্ষী থানাত চৰমপন্থা বাছি লোৱাৰ হুংকাৰ দিয়ে তেওঁৰ মাতৃয়ে ৷ ইফালে অজয় দত্তৰ ভাতৃয়ে আৰক্ষীৰ ভূমিকাক সমালোচনা কৰি অভিযুক্তৰ লগত গোপন মিতিৰালিৰে এই বিষয়টো গাপ দিয়াৰ চেষ্টা কৰা বুলি অভিযোগ তুলিছে ৷
উল্লেখ্য যে, বিজয়া দশমীৰ দিনা পূজাৰ মেলালৈ আহোতে বিয়লি পথৰ মাজত সূত্ৰপাত হোৱা এক কাজিয়াৰ ফলস্বৰূপে আৰক্ষীয়ে অজয় দত্তক কৰায়ত্ত কৰি ৰাজহুৱাভাৱে প্ৰহাৰ কৰে ৷ ইমানতেই ক্ষান্ত নাথাকি অজয়ক গাড়ীত উঠাই লৈ যায় আৰু শাৰীৰিক আৰু মানসিকভাৱে অত্যাচাৰ কৰি প্ৰায় দুঘন্টাৰ পাচত ঘৰৰ কোনো লোকক অৱগত নকৰাকৈ এৰি দিয়ে । আৰক্ষীয়ে বিনা কাৰণত কৰা দুৰ্ব্যৱহাৰ আৰু ৰাজহুৱাভাৱে অত্যাচাৰ কৰা সকলো বিৱৰি ছ'চিয়েল মিডিয়াত এক ভিডিঅ’ আপলোড কৰাৰ লগতে চৰমপন্থা গ্ৰহণ কৰে ৷
লগতে পঢ়ক: Dergaon Suicide Case : মৃত পুত্ৰৰ ন্যায় বিচাৰি থানাত ৰুগীয়া মাতৃ হিয়া ভগা কান্দোন
