যোৰহাট, ১ জুলাই : তিনিদিনীয়া কাৰ্যসূচীৰে আয়োজিত যোৰহাট জিলা দিৱসৰ আজি সামৰণি পৰিল। এই দিৱসৰ জৰিয়তে জিলাবাসীয়ে জিলাখনৰ ইতিহাস আৰু বৰ্তমান সম্পৰ্কে জানিব পাৰিব বুলি মন্তব্য় কৰে বিত্ত মন্ত্ৰী অজন্তা নেওগে । পীতাম্বৰ দেৱ গোস্বামী প্ৰেক্ষাগৃহত আয়োজিত এক ৰাজহুৱা সভাত অংশগ্ৰহণ কৰি জিলাখনৰ অভিভাৱক মন্ত্ৰী অজন্তা নেওগে কয় যে মুখ্যমন্ত্ৰী ড৹ হিমন্ত বিশ্ব শৰ্মাই লোৱা এই পদক্ষেপৰ জৰিয়তে এখন জিলাৰ ইতিহাস,বৰ্তমান আৰু ভৱিষ্যত সম্পৰ্কে জিলাবাসীয়ে জানিব পাৰিব। লগতে জিলাখনৰ পৰিকল্পনা সমূহ ৰাইজে বুজিবলৈ সক্ষম হ'ব বুলিও তেওঁ কয় ।
আজি জিলা দিৱসৰ এই কাৰ্যসূচীত বিভিন্ন ক্ষেত্ৰত পাৰদৰ্শিতা লাভ কৰা কৃতি শিক্ষাৰ্থী সকলক সম্বৰ্ধনা জনাই মন্ত্ৰী অজন্তা নেওগে । উল্লেখযোগ্য যে, উক্ত দিৱসৰ লগত সংগতি ৰাখি যোৰহাট কছাৰী ময়দানৰ পৰা সকলো জাতি জনগোষ্ঠীৰ বাৰেৰহনীয়া এক সাংস্কৃতিক শোভাযাত্ৰা নগৰ মাজেৰে উলিওৱা হয় । আজি পুৱা ভাগত উলিওৱা সাংস্কৃতিক শোভাযাত্ৰাত জিলাবাসীয়ে স্বতঃস্ফুৰ্তভাৱে ওলাই আহি অংশগ্ৰহণ কৰে ।
