যোৰহাট, ১৩ এপ্ৰিল : ৰাষ্ট্ৰীয় ক্ৰীড়া জগতত জিলিকা এগৰাকী মহিলা । নাম বন্দনা সোণোৱাল । গোলাঘাট আৰু যোৰহাট জিলাৰ সমীপৱৰ্তী সৰু কছাৰী গাঁৱত বাস কৰা বন্দনাৰ আছে এক সুকীয়া পৰিচয় । ভাৰোত্তোলন খেলৰ বাবে 2015 চনত ৰাষ্ট্ৰীয় সোণৰ পদক অৰ্জন কৰিবলৈ সক্ষম হৈছিল বন্দনাই । বন্দনাৰ এই পদকৰ বাবে অসমৰ লগতে ভাৰতক বিশ্বৰ ভিতৰত জিলিকাই তুলিছিল । কিন্তু বৰ্তমান সময়ত বন্দনাৰ জীৱনলৈ নামি আহিছে অমানিশা । কিয়নো এটি জটিল ৰোগত আক্ৰান্ত হৈ স্বামীৰ মৃত্যু হোৱাৰ পাছৰে পৰা তিনিটাকৈ সন্তানক পোহ-পাল দিয়াত হাজাৰ সমস্যাৰ সন্মুখীন হ'বলগীয়া হয় বন্দনাই । ইফালে অসম তথা ভাৰতলৈ সুনাম কঢ়িয়াই অনা বন্দনাক অসম চৰকাৰে কোনো ধৰণৰ সুবিধা প্ৰদান নকৰাত ক্ষোভিত হৈ পৰে বন্দনা । বন্দনাই কয়, যদি অসম চৰকাৰে এনে ধৰণৰ খৈলুৱৈসকলক সহায়-সহযোগিতা নকৰে তেন্তে ভৱিষ্যতে নৱ-প্ৰজন্মসকলৰ ক্ৰীড়াৰ প্ৰতি আকৰ্ষণ কমি আহিব ।
আনহাতে, বন্দনাই নিজৰ জীৱনলৈ অহা দুৰ্ভোগবোৰৰ বাবে অসম চৰকাৰক অৱগত কৰিছিল যদিও অসম চৰকাৰে কোনে গুৰুত্ব প্ৰদান নকৰাৰ অভিযোগ উত্থাপন কৰে । ইফালে নিজ স্বামীক হেৰুৱাৰ পাচত তিনি সন্তানৰ দায়িত্বত ব্যস্ত হৈ পৰা বন্দনাই আঁতৰি থাকিবলগীয়া হয় ভাৰ উত্তোলন খেলৰ পৰা । শনিবাৰে ই.টি.ভাৰতৰ সাংবাদিকৰ আগত বন্দনাই নিজ সমস্যাৰ বাবে পুনৰবাৰ অসম চৰকাৰ তথা সৰ্বানন্দ সোণোৱালক অৱগত কৰাৰ কথা উল্লেখ কৰে ।
