যোৰহাট, 11 আগষ্ট : কৰ‘ণা মহামাৰীৰ ফলত চলি থকা লক ডাউনে ব্যাপক ভাৱে প্ৰভাৱ পেলাইছে শিক্ষাক্ষেত্ৰত । বিশেষকৈ অন লাইন প্ৰক্ৰিয়াৰে নামভৰ্তি চলি থকা বিভিন্ন মহাবিদ্যালয়ত এতিয়াও বহু ছাত্ৰ-ছাত্ৰীয়ে নামভৰ্ত্তি সম্পন্ন কৰিবলৈ সক্ষম হোৱা নাই । বিশেষকৈ যোৰহাটৰ দুখনকৈ মহাবিদ্যালয় ক্ৰমে বাহনা মহাবিদ্যালয় আৰু যোৰহাট কেন্দ্ৰীয় মহাবিদ্যালয়ত উচ্চতৰ মাধ্যমিক শ্ৰেণীত আসনৰ অভাৱত শতাধিক ছাত্র ছাত্ৰীয়ে নামভৰ্ত্তিৰ পৰা বঞ্চিত হ'বলগীয়া হৈছে । দুয়োখন মহাবিদ্যালয়তে চাৰি শতাধিক ছাত্র ছাত্ৰীয়ে নামভৰ্ত্তিৰ বাবে আবেদন কৰাৰ বিপৰীতে প্ৰতিখন মহাবিদ্যালয়ত ১৫০ জনকৈ শিক্ষাৰ্থীৰ বাবে আসনৰ ব্যৱস্থা আছে । বৰ্তমান আসনৰ অভাৱত প্ৰতিখন মহাবিদ্যালয়তে প্ৰায় দুই শতাধিকৰ অধিক ছাত্র ছাত্ৰীয়ে নামভৰ্ত্তিৰ সুবিধাৰ পৰা বঞ্চিত হ'ব লগা অৱস্থাৰ সৃষ্টি হৈছে । ইয়াৰ ফলত ছাত্র ছাত্ৰী সকলৰ শৈক্ষিক জীৱনলৈ অন্ধকাৰ নামি আহিছে ।
সদৌ অসম ছাত্র সন্থাৰ পূৱ যোৰহাট সমিতিয়ে মঙলবাৰে মহাবিদ্যালয় দুয়োখনত আসনৰ সংখ্যা বৃদ্ধিৰ দাবীত ভোগদৈ দলঙৰ ওপৰত প্ৰতিবাদী কাৰ্যসূচী গ্ৰহণ কৰে।
প্ৰতিবাদকাৰী সকলে যোৰহাট জিলা প্ৰশাসনৰ লগতে শিক্ষা বিভাগক অতিশীয্ৰে এই সীমিত আসন সমূহ বৃদ্ধি কৰি ছাত্র ছাত্ৰী সকলৰ শৈক্ষিক জীৱন ৰক্ষা কৰিবলৈ দাবী জনায়।
লগতে পঢ়ক : গোৱাত সুৰংগৰ দেৱাল খহি ব্যাহত ৰে’লসেৱা
