হোজাই,27 এপ্ৰিল: লংকাৰ 10 নং ৱাৰ্ডত সংঘটিত হৈছে এক জঘন্য ঘটনা ৷ এগৰাকী মহিলাৰ আত্মহত্যাক কেন্দ্ৰ কৰি গাঁৱবাসীয়ে সৃষ্টি কৰে উত্তপ্ত পৰিস্থিতি ৷
স্থানীয় ৰাইজে অভিযোগ কৰা অনুসৰি, মন্তোশ মহাজন নামৰ এজন যুৱকে একে গাঁৱৰে এগৰাকী বিবাহিত মহিলাৰ অশ্লীল ভিডিঅ’ বনাই ভিডিঅ’টো ভাইৰেল কৰাৰ ভাবুকি প্ৰদান কৰে ৷ আনকি এই ভিডিঅ’ৰ জৰিয়তে মহিলাগৰাকীক বিভিন্ন প্ৰকাৰৰ ভয়-ভাবুকিৰে ব্লেকমেইল কৰা আৰম্ভ কৰে ব্যক্তিজনে ৷ পৰৱৰ্তী সময়ত মন্তোশ মহাজন নামৰ ব্যক্তিজনে মহিলাগৰাকীক ধৰ্ষণ কৰাৰ কথা জানিব পৰা গৈছে ৷ উপায়ন্তৰ মহিলা গৰাকীয়ে এই বিষয়ে কাকো অৱগত কৰিব নোৱাৰি দেওবাৰে বাচি লয় আত্মহননৰ পথ ৷
পৰৱৰ্তী সময়ত ঘটনাস্থলীত আৰক্ষী উপস্থিত হৈ মৃতদেহ উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰে ৷ মৰণোত্তৰ পৰীক্ষাৰ অন্তত সোমবাৰে আৰক্ষীয়ে মৃতদেহতো গতাই দিয়ে পৰিয়ালৰ লোকক ৷
মহিলা গৰাকীৰ মৃত্যু সন্দৰ্ভত সকলো কথা জানিব পাৰি সোমবাৰে গাঁৱবাসী উত্তেজিত হৈ সৃষ্টি কৰে উত্তপ্ত পৰিস্থিতি ৷ আনকি স্থানীয় ৰাইজে ধৰ্ষণ কাণ্ডটোৰ লগত জড়িত ব্যক্তি গৰাকীৰ ঘৰ ভাঙি লণ্ড-ভণ্ড কৰে । গাঁৱবাসীৰ ৰুদ্ৰমূৰ্তি দেখি পলায়ন কৰে অভিযুক্তই ৷ পৰৱৰ্তী সময়ত আৰক্ষী উপস্থিত হোৱাত নিয়ন্ত্ৰণ হয় পৰিস্থিতি ৷
ইতিমধ্যে ভুক্তভোগী মহিলাগৰাকীৰ পৰিয়ালে ঘটনা সন্দৰ্ভত স্থানীয় আৰক্ষী চকীত ৰুজু কৰিছে গোচৰ ৷ সম্প্ৰতি পলাতক অৱস্থাত আছে অভিযুক্ত ৷
লগতে পঢ়ক: মানাহ ৰাষ্ট্ৰীয় উদ্যানত কি কৰিছে বিপিএফৰ প্ৰাৰ্থী সকলে ?
