হোজাই,২৬ মে': যোৱা কেইবাদিনো ধৰি হোৱা নেৰানেপেৰা বৰষুণৰ ফলত ৰাজ্যৰ বিভিন্ন প্ৰান্তৰ লগতে বেয়াকৈ ক্ষতিগ্ৰস্ত হৈছিল হোজাই জিলাৰ বিস্তীৰ্ণ অঞ্চল(Vast area of Hojai devastated by floods) । কাৰ্বি লাংপি গেটৰ পৰা পানী এৰি দিয়াৰ ফলত কপিলী নৈয়ে সংহাৰী ৰূপ ধাৰণ কৰি বাস্তৰ ক্ষতিসাধন কৰিছিল হোজাই জিলাৰ নৈ পৰীয়া অঞ্চল সমূহত । বানাক্ৰান্ত ৰাইজৰ দুখ-দুৰ্দশাৰ বুজ লবলৈ হোজাইত উপস্থিত হয় ইজনৰ পাছত সিজনকৈ জনপ্ৰতিনিধি ।
সমান্তৰালভাৱে হোজাইৰ বান বিধ্বস্ত অঞ্চল পৰিদৰ্শন কৰে যোৰহাট লোকসভাৰ সমষ্টিৰ সাংসদ কামাখ্যা প্ৰসাদ তাছাই(MP Kamakhya Prasad Tasha in Hojai flood devastated area) । সাংসদগৰাকীয়ে হোজাইৰ বানত ক্ষতিগ্ৰস্ত বিভিন্ন অঞ্চললৈ গৈ বানত ক্ষতিগ্ৰস্ত ৰাইজৰ সৈতে মত বিনিময় কৰি তেঁওলোকৰ দুখ-দুৰ্দশাৰ বুজ লয় । হোজাইৰ বিধায়ক ৰামকৃষ্ণ ঘোষক লগত লৈ পৰিদৰ্শন কৰে সমগ্ৰ অঞ্চল । বিধায়কৰ নেতৃত্বত শীঘ্ৰেই বানত ক্ষতিগ্ৰস্ত অঞ্চলসমূহৰ বাটপথৰ পুনৰ নিৰ্মাণৰ লগতে ক্ষতিগ্ৰস্ত ৰাইজক পুনৰ সংস্থাপিত হোৱাত সহায় কৰিব ।
উল্লেখ্য যে হোজাই জিলাৰ নৈ পৰীয়া অঞ্চল সমূহত কপিলী নৈৰ বাঢ়নী পানী ক্ৰমান্বয়ে কমাত শিবিৰ সমূহত থকা বানাক্ৰান্ত লোকসকল নিজ নিজ গৃহলৈ যাবলৈ আৰম্ভ কৰিছে । নিজ নিজ গৃহলৈ যোৱাত বানত সৰ্বস্বান্ত হেৰুৱাই বানাক্ৰান্ত লোকসকল বৰ্তমান বৃহৎ খাদ্য সংকট ভোগাৰ লগতে বহু অঞ্চলৰ বাট পথ বানে উটুৱাই নিয়াত যাতায়তৰ ক্ষেত্ৰত চৰম অসুবিধাৰ সন্মুখীণ হৈছে ।
