হোজাই,11 আগষ্ট: বিগত কিছুদিন পূৰ্বে হোজাইৰ ওৱাৰীগেডিং গাঁৱৰ ৰে’লপথৰ দাঁতিত উদ্ধাৰ হৈছিল এক অচিনাক্ত মৃতদেহ ৷ এখন নম্বৰ প্লেটবিহীন মটৰ চাইকেলৰ তলত পৰি থকা অৱস্থাত উদ্ধাৰ হৈছিল উক্ত মৃতদেহটো ৷ অঞ্চলটোৰ স্থানীয় লোকে মৃতদেহটো প্ৰত্যক্ষ কৰি খবৰ দিয়ে আৰক্ষীক ৷ আৰক্ষীয়ে ঘটনাস্থলীত উপস্থিত হৈ প্ৰাথমিক তদন্ত আৰম্ভ কৰাৰ পিছত মৃতদেহটো ফৈজুল হকৰ বুলি চিনাক্ত কৰে ৷
পূব কাণ্ডুলিমাৰীৰ বাসিন্দা উক্ত ব্যক্তিগৰাকীৰ ক্ষত-বিক্ষত মৃতদেহ উদ্ধাৰৰ পিছত মৰণোত্তৰ পৰীক্ষাৰ ব্যৱস্থা কৰিছিল আৰক্ষীয়ে ৷ ইফালে এই ঘটনা লগত ব্যক্তিগৰাকীৰ পৰিয়ালৰ লোকে জড়িত থকাৰ সন্দেহত দুগৰাকী ব্যক্তিৰ বিৰুদ্ধে যোগিজান আৰক্ষী চকীত দাখিল কৰিছিল এক এজাহাৰ ৷ পৰিয়ালৰ লোকৰ এজাহাৰৰ ভিত্তিত আৰক্ষীয়ে ব্যক্তি দুগৰাকীক আটক কৰি অব্যাহত ৰাখিছে সোধ-পোচ ৷ ফৈজুল হকৰ পৰিয়ালবৰ্গই ঘটনা সন্দৰ্ভত অধিক লোক জড়িত থকাৰ সন্দেহ প্ৰকাশ কৰিছে যদিও বৰ্তমানলৈকে ঘটনা সন্দৰ্ভত কোনো শুংসূত্ৰ লাভ কৰা নাই আৰক্ষীয়ে ৷
