হোজাইত কংগ্ৰেছ কৰ্মীৰ মাজত প্ৰচণ্ড মাৰপিট

হোজাই জিলাৰ ৰাজীৱ ভৱনত জিলা সাধাৰণ সভা চলি থকাৰ সময়তেই তাত উপস্থিত কংগ্ৰেছ কৰ্মীৰ মাজত প্ৰচণ্ড মাৰপিটৰ ঘটনা ৷

হোজাই, 29 জুলাই: হোজাই জিলাৰ ৰাজীৱ ভৱনত জিলা সাধাৰণ সভা চলি থকাৰ সময়তেই তাত উপস্থিত কংগ্ৰেছ কৰ্মীৰ মাজত প্ৰচণ্ড মাৰপিটৰ ঘটনা সংঘটিত হয় ৷ হোজাইৰ ৰাজীৱ ভৱনত চলি থকা জিলা সভাৰ মাজতেই বিন্নাকান্দি ব্লক কংগ্ৰেছৰ সভাপতি ৰেহান উদ্দিনে যমুনামুখ সমষ্টিৰ যুৱ কংগ্ৰেছৰ সভাপতিৰ লগত প্ৰথমাবস্থাত তৰ্কা-তৰ্কিত লিপ্ত যদিও পৰৱৰ্তী সময়ত লগত লৈ অহা গুণ্ডা বাহিনীৰ দ্বাৰা বাঁহ লৈ প্ৰহাৰ কৰে ৷ নিজৰ ব্যক্তিগত শিল বালিৰ ব্যৱসায়ৰ খাতিৰত বিজেপিৰ সতে ভিতৰি মিত্ৰতা কৰি আছে বুলি উক্ত সভাত এক অভিযোগ আনিছিল যমুনামুখ সমষ্টিৰ যুৱ কংগ্ৰেছৰ সভাপতি চাইদুল আলমে ৷ তাকে লৈ সংঘটিত হয় এই মাৰপিটৰ ঘটনাৰ ৷ উল্লেখযোগ্য যে,কংগ্ৰেছ দলৰ হাতত থকা হোজাই জিলা পৰিষদৰ খনৰ ওপৰত ইতিমধ্যে অনাস্থা প্ৰস্তাৱ আনিছিল ৰেহান উদ্দিনৰ উচতনিত আন দুজন জিলা পৰিষদৰ কংগ্ৰেছ সদস্যই ৷ পৰৱৰ্তী সময়ত এই ঘটনাৰ সন্দৰ্ভত হোজাই জিলা কংগ্ৰেছৰ সাধাৰণ সম্পাদকে এক প্ৰেছ বিজ্ঞপ্তি যোগে দল বিৰোধী কাৰ্যকলাপ আৰু বিজেপিক সমৰ্থন কৰাৰ বাবে ৯ জন সদস্যক কংগ্ৰেছ দলৰ পৰা বহিস্কাৰ কৰে ৷ বহিষ্কৃত সদস্য সকল ক্ৰমে বিন্নাকান্দি ব্লক কংগ্ৰেছৰ সভাপতি ৰেহান উদ্দিন,নীলবাগান জিলা পৰিষদৰ সদস্য নেৱাজ উদ্দিন,ডবকা জিলা পৰিষদৰ সদস্য নুৰ আহমেদ,চাংমাজী পঞ্চায়তৰ এপি মিনাক্ষী বাগলাৰী,বালিৰামৰ এ পি দিপা দাস,সুতাৰগাঁওৰ এ পি প্ৰাণবল্লভ দেৱনাথ,যমুনামুখৰ এ পি প্ৰতীম চৌধুৰী,ভেলৌগুৰীৰ এ পা কামাল উদ্দিন, নগঞাপামৰ এ পি জাহানাৰা বেগম ৷ বৰ্তমানলৈকে উক্ত ঘটনা সন্দৰ্ভত চাইদুল আলমে আৰক্ষীৰ আগত কোনোধৰণৰ এজাহাৰ দাখিল কৰা নাই৷