বেঙুনীবস্তি নৈত সলিল সমাধি দুই যুৱকৰ

ৰে’ল নগৰীত সংঘটিত শোকাৱহ ঘটনা ৷ নৈত গা ধুবলৈ যোৱা যুৱকৰ মৃত্যু ৷ এজনক জীৱন্তে উদ্ধাৰ ৷ শাওণৰ ভৰা নৈৰ বুকুৰ জলস্তৰ বৃদ্ধিৰ বাবে অঘটন সংঘটিত হোৱাৰ ধাৰণা ৷

হোজাই, 5 আগষ্ট : শাওণৰ ভৰা নৈৰ বুকু কিমান ভয়ংকৰ এই কথা প্ৰতিগৰাকী অসমীয়াৰে জ্ঞাত ৷ তাৰপিছতো কিন্তু এসময়ত শাওণৰ মাহত ভৰা ব্ৰহ্মপুত্ৰ নিৰ্ভয়ে সাঁতুৰি পাৰ হৈছিল মহাপুৰুষ শ্ৰীমন্ত শংকৰদেৱে ৷ পিছে তেতিয়াৰ কাহিনী আছিল সুকীয়া ৷ এইবাৰ ঘটনাৰ স্থান হোজাই জিলাৰ লামডিঙহে ৷ বুধবাৰে বিয়লি লামডিঙৰ বেঙুনীবস্তি নদীত গা ধুবলৈ গৈছিল তিনি বন্ধুৱে ৷ তাৰে দুজন যুৱকে মৃত্যুক আঁকোৱালি লোৱাৰ বিপৰীতে কথমপি প্ৰাণ ৰক্ষা পৰে এগৰাকী যুৱকৰ ৷

ঘটনাৰ বিৱৰণী অনুসৰি, ৰে’ল নগৰী লামডিঙত বুধবাৰে সন্ধিয়াৰ ভাগত সংঘটিত হৈছে এই অঘটনটো ৷ শাস্ত্ৰী গাঁৱৰ মাজেৰে বৈ যোৱা এখন নদীলৈ গা ধোৱাৰ উদ্দেশ্যে গৈছিল তিনিগৰাকী যুৱক ৷ অঞ্চলটোত দীৰ্ঘদিনে বাস কৰি অহা অভিষেক বাল্মীকি, সত্যজিৎ ৰাউট আৰু গৌতম ৰাউটে আন কেইগৰাকীমান স্থানীয় যুৱকৰ সৈতে নদীলৈ গৈছিল ৷ দুৰ্ভাগ্যক্ৰমে তিনিওজন যুৱক নৈৰ কোবাল সোঁতত পৰি ডুব যায় ৷ এই ঘটনাৰ খবৰ লাভ কৰা মাত্ৰকে ঘটনাস্থলীত উপস্থিত হয় স্থানীয় ৰাইজ ৷ ৰাইজে সতীৰ্থকেইজনৰ সহযোগত যুৱক কেইজনক উদ্ধাৰ কৰে ৷

পৰৱৰ্তী সময়ত যুৱক কেইজনক ভৰ্তি কৰোৱা হয় লামডিং ৰে’লৱে হাস্পতালত ৷ কিন্তু হাস্পতালত সত্যজিৎ ৰাউট ওৰফে শিৱা আৰু অভিষেক বাল্মীকি ওৰফে বিশাল নামৰ যুৱক দুজনক চিকিৎসকে মৃত ঘোষণা কৰে ৷ তদুপৰি আনজন যুৱক সম্প্ৰতি চিকিৎসালয়ত সংকটজনক অৱস্থাত চিকিৎসাধীন হৈ আছে ৷ উল্লেখ্য যে, প্ৰায় ছজনীয়া যুৱকৰ দলটোৰ তিনিজনে নৈত ডুব যায় ৷ মৃত যুৱকদ্বয়ৰ অভিভাৱক ৰে’ল বিভাগত কৰ্মৰত ৷ এই ঘটনাই অঞ্চলটোত শোকৰ ছাঁ পেলাইছে ৷

লগতে চাওকঃ কাক ‘উগ্ৰপন্থী’ সজালে বিধানসভাৰ অধ্যক্ষই ?