হাইলাকান্দি, 21 ছেপ্তেম্বৰ : মুখ্যমন্ত্ৰীৰ নিৰ্দেশৰ পিছতে সমগ্ৰ ৰাজ্যৰ লগতে হাইলাকান্দি জিলাতো তীব্ৰতৰ হৈছে দালাল বিৰোধী অভিযান ৷ হাইলাকান্দি আৰক্ষীয়ে নিশা জিলাৰ আলগাপুৰ, লালা, কাটলিছেড়া সহ জিলা সদৰৰ বিভিন্ন স্থানত অভিযান চলাই মাটিৰ দালালিত জড়িত থকা অভিযোগত 12 জনকৈ লোকক আটক কৰিছিল ৷ কিন্তু আশ্বৰ্যজনক ভাৱে ইয়াৰে 2 জন লোকক আৰক্ষী থানাৰ পৰা মোকলাই নি মালা পিন্ধাই বিজয় উৎসৱ পালন কৰিলে আলগাপুৰ সমষ্টিৰ বিধায়ক নিজাম উদ্দিন চৌধুৰীয়ে ৷
এই ঘটনাই এতিয়া সমগ্ৰ হাইলাকান্দিৰ লগতে ৰাজ্যজুৰি চাঞ্চল্যৰ সৃষ্টি কৰিছে ৷ আনহাতে হাইলাকান্দিৰ আৰক্ষী অধীক্ষক গৌৰৱ উপাধ্যায়ে এই সন্দৰ্ভত প্ৰতিক্ৰিয়া ব্যক্ত কৰি হাইলাকান্দিত আটক হোৱা 12 গৰাকী ব্যক্তিৰ ভিতৰত 5 গৰাকীক এৰি দিয়া হৈছে বুলি মন্তব্য কৰে ৷ বাকী 7 গৰাকী ব্যক্তিক মঙলবাৰে আদালতত হাজিৰ কৰা হয় বুলিও জনায় আৰক্ষী অধীক্ষক গৰাকীয়ে ৷ লগতে এৰি দিয়া কেইগৰাকী মাটি দালালৰ সৈতে জড়িত নহয় বুলি মন্তব্য কৰে আৰক্ষী অধীক্ষক গৰাকীয়ে ৷
উল্লেখ্য যে, হাইলাকান্দি আৰক্ষীয়ে নিশা জিলাখনৰ আলগাপুৰ, লালা, কাটলিছেড়া সহ জিলা সদৰৰ বিভিন্ন স্থানত অভিযান চলাই মাটিৰ দালালিত জড়িত থকা অভিযোগত 12 জনকৈ লোকক আটক কৰিছিল ৷ ইয়াৰ ভিতৰত আলগাপুৰ থানা এলেকাৰ পৰা আটক কৰা হৈছিল 4 জন ব্যক্তিক ৷
আটকাধীন দালাল সকলৰ ভিতৰত আছিল ছৰফ উদ্দিন বৰভূঞা নামৰ এগৰাকী পঞ্চায়ত প্ৰতিনিধিও ৷ নিশা এই সকলক আটক কৰি থানাত ৰখাক কেন্দ্ৰ কৰি মঙলবাৰে পুৱাৰে পৰা আলগাপুৰ এলেকাত সৃষ্টি হয় তীব্ৰ উত্তেজনা ৷ মাটিৰ দালালৰ পৰিৱৰ্তে নিৰ্দোষী ব্যক্তিক আৰক্ষীয়ে আটক কৰাৰ অভিযোগ উত্থাপন কৰি একাংশ স্থানীয় ৰাইজে ঘেৰাও কৰে আলগাপুৰ আৰক্ষী চকী ৷ তেওঁলোকৰ প্ৰতিবাদত সমৰ্থন জনাই আগবাঢ়ি আহে আলগাপুৰ সমষ্টিৰ বিধায়ক নিজাম উদ্দিন চৌধুৰীও ৷
লগতে পঢ়কঃ NSCN(IM)ৰ সৈতে আলোচনাত বহিল হিমন্ত বিশ্ব শৰ্মা
প্ৰাপ্ত খবৰ মতে, বিধায়ক গৰাকী থানালৈ আহি কৰ্তব্যৰত আৰক্ষী বিষয়া সকলক আটকাধীন ব্যক্তি সকলক মুক্ত কৰি দিয়াৰ বাবে তীব্ৰ হেঁচা প্ৰয়োগ কৰে ৷ অৱশেষত আলগাপুৰ আৰক্ষীয়ে বিধায়কৰ হেঁচাত ছৰফ উদ্দিন বৰভূঞা আৰু আনোৱাৰ উদ্দিন লস্কৰ নামৰ দুই ব্যক্তিক মুক্ত কৰি দিয়ে ৷ ইপিনে, তেওঁলোকক আৰক্ষীয়ে এৰি দিয়াৰ পিছতে ডিঙিত মালা পিন্ধাই আৰু ফটাকা ফুটাই বিধায়ক নিজাম উদ্দিনৰ বাসগৃহলৈ লৈ যোৱা হয় ৷ স্বয়ং বিধায়কে আদৰণি জনালে এই দুই ব্যক্তিক ৷
উল্লেখ্য যে, বিধায়কৰ হেঁচাত আৰক্ষীয়ে এনেদৰে দুই দলালক এৰি দিয়া ঘটনাই হাইলাকান্দিত সৃষ্টি কৰিছে চাঞ্চল্যৰ ৷ ঘটনাৰ উচিত তদন্তৰ কৰিবলৈ মুখ্যমন্ত্ৰীলৈ আহ্বান জনাইছে সাধাৰণ ৰাইজে ৷
লগতে পঢ়কঃ Operation মাটিৰ দালাল : একে নিশাই গ্ৰেপ্তাৰ ৪৫৩ জন মাটিৰ দালাল
