হাইলাকান্দি, 5 জানুৱাৰীঃ পাঁচগ্রাম কাগজকলৰ কৰ্মীৰ সন্তানে পথত নামি ভিক্ষা কৰাৰ ঘটনা সংবাদ মাধ্যমত সম্প্ৰচাৰিত হোৱাৰ পিচতে এওঁলোকৰ সহায়ৰ বাবে আগবাঢ়ি আহিছে বিভিন্ন সামাজিক সংস্থাৰ লগতে বহু প্ৰতিষ্ঠান । দেওবাৰে কৰিমগঞ্জ জিলাৰ ৰাতাবাৰীৰ Assam Social welfare foundation নামৰ এটা সমাজসেৱী সংগঠনে পাঁচগ্রামৰ কাগজকল কৰ্মীৰ পৰিয়ালক বহী, কলম প্ৰদান কৰাৰ লগতে ১৫০০০ টকা সাহায্যও প্ৰদান কৰে ।
ইয়াৰোপৰি কাগজকল কৰ্মীৰ পৰিয়ালক সহায়ৰ হাত আগবঢ়ালে আলগাপুৰৰ এআইইউডিএফ বিধায়ক নিজাম উদ্দিন চৌধুৰীয়ে ৷ শনিবাৰে কাগজকল কৰ্মীসকলৰ সন্তানৰ পঢ়া-শুনাৰ বাবে আৰ্থিক সাহায্য প্ৰদান কৰে বিধায়কগৰাকীয়ে ৷ লগতে মুখ্যমন্ত্রী সর্বানন্দ সোনোৱালৰ লগত আলোচনা কৰি বিধায়কগৰাকীয়ে চৰকাৰী আঁচনি 'সুৰীত' ৰ দ্বাৰা আৰু আজমল ফাউণ্ডেশ্যনৰ জৰিয়তে কাগজকল কৰ্মীসকলৰ সন্তানক সাহায্য প্ৰদানৰ ব্যৱস্থা কৰিব বুলি জানিবলৈ দিয়ে।
লগতে পঢ়ক: বিমুদ্ৰাকৰণৰ পিচত ভাৰতীয় বায়ুসেনাই সৰবৰাহ কৰিছিল 625 টন নতুন নোট
উল্লেখ্য যে, দুদিন পূৰ্বে অভাৱৰ তাড়নাত পাঁচগ্রামৰ কাগজকল কৰ্মীসকলৰ সন্তানে পথত নামি ভিক্ষা কৰাৰ দৃশ্য ETV Bharatত সম্প্ৰচাৰিত হোৱাৰ লগে লগে সমগ্ৰ বৰাকত তীব্ৰ প্ৰতিক্ৰিয়াৰ সৃষ্টি হৈছিল ।
