হাইলাকান্দি, 31 মে' : চাহ শ্ৰমিকক আক্ৰমণ কৰি গ্ৰেপ্তাৰ হ'ল হাইলাকান্দি জিলা বিজেপিৰ সহ-সভাপতি আৰু জিলা চাহ শ্ৰমিক উন্নয়ন বোৰ্ডৰ সভাপতি ৰাধেশ্যাম কৈৰীৰ পুত্ৰ সত্যজিৎ কৈৰী । হাইলাকান্দি জিলাৰ গাগলাছেড়া চাহ বাগিচাৰ শ্ৰমিকসকলে বিগত ২ সপ্তাহৰ পৰা পোৱা নাই নিজ নিজ দৰমহা । বিভিন্ন অজুহাত দেখুৱাই বাগিচাৰ প্ৰৱন্ধকে প্ৰদান কৰা নাই সপ্তাহিক মজুৰি । শুকুৰবাৰেও সপ্তাহিক মজুৰি প্ৰদানৰ দিন আছিল যদিও মজুৰি দিয়াৰ পৰিৱৰ্তে প্ৰবন্ধকে CSPত টকা নথকাৰ অজুহাত দিয়াত প্ৰাপ্য ধন বিচাৰি শ্ৰমিকসকলে সাব্যস্ত কৰে প্ৰতিবাদ ।
শ্ৰমিকৰ এই প্ৰতিবাদ বন্ধ কৰাৰ উদ্দেশ্যে বাগিচাৰ প্ৰৱন্ধকে আশ্ৰয় লয় চাহ শ্ৰমিক উন্নয়ন ব'ৰ্ডৰ সভাপতি আৰু বিজেপি নেতা ৰাধেশ্যাম কৈৰী আৰু তেওঁৰ পুত্ৰ সত্যজিৎ কৈৰীৰ । কিন্তু শ্ৰমিকসকলে ৰাধেশ্যাম কৈৰীৰ কথাত সন্তুষ্ট নহোৱাত তেওঁৰ পুত্ৰ সত্যজিৎ কৈৰীয়ে হাতত লোৰ ৰ'ড আৰু বন্দুক লৈ আক্ৰমণ চলায় শ্ৰমিকসকলৰ ওপৰত । সত্যজিতৰ এই আক্ৰমণত আহত হয় সৰজু নুনিয়া নামৰ এগৰাকী শ্ৰমিক । পাচত ঘটনাস্থলীত আৰক্ষী উপস্থিত হৈ সত্যজিৎ কৈৰীক গ্ৰেপ্তাৰ কৰে ।
আকৌ পঢ়ক - বায়ুসেনাৰ প্ৰাক্তন বিষয়াক মঙলদৈ আদালতৰ যাৱজ্জীৱন কাৰাদণ্ড
