গোলাঘাট , 23 জুলাইঃ প্ৰকৃতিৰ ওপৰত চলোৱা অত্যাচাৰৰ প্ৰতিফল বাৰে-বাৰে ভোগ কৰি আহিছে মানৱ জাতিয়ে ৷ হাতী মানুহৰ সংঘাত, চহৰাঞ্চলত বনৰজাৰ বিচৰণ তথা বিভিন্ন প্ৰাকৃতিক দুৰ্যোগে আমাক বাৰে-বাৰে সোঁৱৰাই আহিছে প্ৰাকৃতিক ভাৰসাম্যতা বিনষ্ট হোৱাৰ ফলত সংঘটিত হ’ব পৰা প্ৰাণনাশক সংকটৰ কথা ৷ কিন্ত অভিজ্ঞতাৰ পাছতো যেন শিক্ষা নহয় জীৱ একাংশ জীৱশ্ৰেষ্ঠ মানুহৰ স্বভাৱসিদ্ধ আক্ৰোশমূলক আচৰণ ৷ চূড়ান্ত স্বাৰ্থপৰতাৰ নিৰ্দশন উদঙাই একাংশই নিৰবিচিন্ন অত্যাচাৰ চলাই আহিছে প্ৰকৃতিৰ ওপৰত , অব্যাহত ৰাখিছে প্ৰকৃতিৰ ভাৰসামত্যা নষ্ট কৰিব পৰা যৎপৰোনাস্তি প্ৰচেষ্টা ৷
অনুৰূপ ঘটনা নুমলীগড়ৰ লেটেকুজান চাহ বাগিছাত , ৰাজ্যখনৰ ঠায়ে-ঠায়ে হস্তী-মানৱ সংঘাতে বহু পৰিয়ালৰ জীৱনলৈ অমানিশা নমাই অনাৰ সময়তে হাতীৰ জাকৰ ওপৰত আক্ৰমণ আৰু অবৰ্ণনীয় অত্যাচাৰ চলাই আহিছে বাগিছাখনৰ একাংশ ব্যক্তিয়ে ৷ হাতত কেটেপা, ধনু কাঁড়, ফটকা লৈ হাতীৰ জাকৰ ওপৰত নিৰ্মম আক্ৰমণ বাগিছাখনৰ আৱাসী সকলৰ ৷ ফলাফল , উখহা কপাল লৈ পলাইছে কোনো এটা হাতীয়ে , গুৰুতৰভাৱে ঠেঙত আঘাতপ্ৰাপ্ত হৈ সুৰক্ষিত স্থানৰ সন্ধানত ঢপলিয়াইছে আন এটা হাতীয়ে ৷ মানুহৰ অত্যাচাৰত দিক-বিদিক হেৰুৱাই নিজ সন্তানক সুৰক্ষা দিয়াৰ চেষ্টা কৰিছে নিঃসহায় হাতীৰ জাকটোৱে ৷
উল্লেখযোগ্য যে, নিশা খাদ্যৰ সন্ধানত কাষৰীয়া অঞ্চলত এই বনৰীয়া হাতীৰ জাকটোৱে বিচৰণ কৰে যদিও দিনৰ ভাগত লেটেকুজান চাহ বাগিছাত অৱস্থান কৰে জাকটোৱে ৷ সেই সময়তেই গাঁও বা মানুহৰ বাসস্থানৰ পৰা নিলগত এই হাতীৰ জাকটোৱে অৱস্থান কৰাৰ পিছতো কিছুমান দুষ্কৃতিকাৰীয়ে প্ৰায়ে কেটেপা, ফটকা, ধনুৰে আক্ৰমণ কৰি নিৰ্মম অত্যাচাৰ চলোৱা দেখা যায় হাতীৰ জাকটোৰ ওপৰত ৷
