নিউজ ডেস্ক, ডিচেম্বৰ 5 : কেন্দ্ৰীয় কেবিনেটে নাগৰিকত্ব সংশোধনী বিধেয়কত অনুমোদত জনোৱাৰ পিচতেই বিধেয়ক বিৰোধী প্ৰতিবাদৰ জোৱাৰ উঠিছে ৰাজ্যত ৷ ৰাজ্যৰ বিভিন্ন প্ৰান্তত মুখ্যমন্ত্ৰী সৰ্বানন্দ সোণোৱাল আৰু বিজেপি তথা অগপ নেতৃত্বৰ প্ৰৱেশ নিষিদ্ধ কৰিছে দল-সংগঠনে ৷ আছু-কৃষক মুক্তি সংগ্ৰাম সমিতি- সদৌ অসম জাতীয়তাবাদী যুৱ ছাত্ৰ পৰিষদকে ধৰি বিভিন্ন দল সংঠনে তীব্ৰ বিৰোধিতা জনাইছে এই বিধেয়কৰ ৷
বৃহস্পতিবাৰৰ দিনটোত ৰাজ্যৰ ভিন্ন প্ৰান্তত দেখা গ'ল আছুৰ কেব বিৰোধী প্ৰতিবাদ ৷ মাজুলীত আছুৰ নেতৃত্বত ৰাজপথত নাগৰিকত্ব সংশোধনী বিধেয়ক দাহ কৰে শতাধিক ছাত্ৰ-ছাত্ৰীয়ে ৷ যোৰহাট, তিনিচুকীয়াতো দল-সংগঠনে বিভিন্ন প্ৰতিবাদী শ্ল'গান দিয়াৰ লগতে সৰ্বানন্দ সোণোৱাল, নৰেন্দ্ৰ মোডীৰ প্ৰতিকৃতি দাহ কৰে ৷ গুৱাহাটী মহাবিদ্যালয়তো নাগৰিকত্ব সংশোধনী বিধেয়কৰ বিৰুদ্ধে প্ৰতিবাদ সাব্যস্ত কৰে ছাত্ৰ ছাত্ৰীয়ে ৷ এই বিধেয়ক কোনো কাৰণতে মানি লোৱা নহব বুলি স্পষ্ট কৰি দিয়ে ছাত্ৰসমাজে ৷
গোলাঘাটত প্ৰধানমন্ত্ৰী নৰেন্দ্ৰ মোডী, কেন্দ্ৰীয় গৃহমন্ত্ৰী অমিত শ্বাহ, মুখ্যমন্ত্ৰী সৰ্বানন্দ সোণোৱাল, হিমন্ত বিশ্ব শৰ্মা, অতুল বৰা, কেশৱ মহন্তৰ প্ৰতিকৃতি দাহ কৰি প্ৰতিবাদ সাব্যস্ত কৰে অসম জাতীয়তাবাদী যুৱ পৰিষদে ৷ টিংখাঙত ৰাজগড় আঞ্চলিক ছাত্ৰ সন্থাৰ উদ্যোগত আৰু ভোজপুৰী যুৱ ছাত্ৰ পৰিষদ, আদিবাসী ছাত্ৰ সন্থা, গোৰ্খা ছাত্ৰ সন্থাকে আদি কৰি বিভিন্ন দল সংগঠনে বিক্ষোভ কাৰ্যসূচীৰে অৱস্থান ধৰ্মঘট কৰে । আটছা (স্বতন্ত্ৰ)ৰ নেতৃত্বত চাহ জনগোষ্ঠী লোকসকলে ধনু, কাঁড় লৈ ৰাজপথলৈ ওলাই অহাৰ হুংকাৰ প্ৰদান কৰে ৷
শিলচৰতো জাতি ধংসী নাগৰিকত্ব সংশোধনী বিধেয়কৰ বিৰুদ্ধে প্ৰতিবাদ সাব্যস্ত কৰে আছুৰ কাছাৰ জিলা সমিতিয়ে ৷ ওদালগুৰি জিলাৰ টংলাত টংলা আঞ্চলিক ছাত্ৰ সন্থাই হাতে- হাতে প্লেকাৰ্ড লৈ “ কেব আমি নামালো, " মুখ্যমন্ত্ৰী সৰ্বানন্দ সোণোৱাল মুৰ্দাবাদ শ্ল'গানেৰে প্ৰতিবাদ সাব্যস্ত কৰে ৷ নাগৰিকত্ব সংশোধনী বিধেয়ক গৃহীত হ'লে পৰিস্থিতি অধিক উত্তাল কৰি তোলাৰ হুংকাৰ দল-সংগঠন সমূহৰ ৷
লগতে পঢ়ক : চল্লিশটা বছৰে পদে পদে ঠগ খাই অহা অসমীয়া জাতি
