গোলাঘাট , 8 এপ্ৰিল: কলিয়াবৰ লোকসভা সমষ্টিৰ প্ৰাৰ্থী মণিমাধৱ মহন্তৰ নিৰ্বাচনী প্ৰচাৰ সভাত উপস্থিত নাথাকিল বিজেপিৰ ষ্টাৰ কেম্পেইনাৰ মন্ত্ৰী হিমন্ত বিশ্ব শৰ্মা । সেয়েহে গোলাঘাট মেৰাপানীত দেওবাৰে সভা আৰম্ভ হোৱাৰ পূৰ্ৱেই ঘৰলৈ উভটিল ৰাইজ ৷
গোলাঘাটৰ মেৰাপানীত কলিয়াবৰ লোকসভা সমষ্টিৰ অগপ বিজেপিৰ মিত্ৰজোঁটৰ প্ৰাৰ্থী মণিমাধৱ মহন্তৰ নিৰ্বাচনী সভা ৷সভাখনত বিজেপিৰ ষ্টাৰ কেম্পেইনাৰ হিমন্ত বিশ্ব শৰ্মা আহিব বুলি গাঁৱে গাঁৱে প্ৰচাৰ চলোৱা হৈছিল ৷ সেই উদ্দেশ্যে হেলিপেডো নিৰ্মাণ কৰা হৈছিল৷ ষ্টাৰ কেম্পেইনাৰ জন আহিব বুলি জানিব পাৰি দিনৰ 11 বজাতে মেৰাপানী খেলপথাৰত তিনি সহস্ৰাধিক লোকৰ আগমন হৈছিল ৷ কিন্তু প্ৰতিকূল বতৰৰ বাবে সভাখনত উপস্থিত থাকিব নোৱাৰিলে ৰাজ্যিক মন্ত্ৰীগৰাকী ৷ আনহাতে প্ৰাৰ্থী মণিমাধৱ মহন্ত আৰু অগপ সভাপতি অতুল বৰাও সভাখনত বহু পলমকৈ সভাত উপস্থিত হ'ল ৷ সেয়েহে সভা আৰম্ভ হোৱাৰ পূৰ্বেই বহু লোক নিজ গৃহলৈ উভতি যোৱা দেখিবলৈ পোৱা গ'ল ৷
