গোলাঘাট, 2 অক্টোবৰ: মানুহৰ প্ৰেম আৰু ভালপোৱা এটি স্বৰ্গীয় দান ৷ প্ৰেম-ভালপোৱাৰ মাজেৰেই গঢ় লৈ উঠে এখন স্বৰ্গীয় অনুভূতিৰ সমাজ বা এটি পৰিয়াল ৷ এনে এক স্বৰ্গীয় প্ৰেম-ভালপোৱাৰ দীঘলীয়া যাত্ৰাৰে জনপ্ৰিয় কন্ঠশিল্পী দ্বীপেন বৰুৱাৰ জীৱনলৈ আহিছিল গোলাঘাটৰ জীয়ৰী চৈয়দা জ্যোৎস্না ৰহমান ৷ প্ৰেমৰ মাজেৰে সংসাৰ গঢ় লৈছিল দুই যুগলবন্দীৰ ৷ অৱশেষত দ্বীপেন বৰুৱাক অকলশৰীয়া কৰি চিৰদিনৰ বাবে অজান দেশলৈ উৰা মাৰিল তেওঁৰ পত্নী চৈয়দা জ্যোৎস্না ৰহমানে ৷ পত্নীক হেৰুৱাই আজি অকলশৰীয়া এইগৰাকী চিৰসেউজ কণ্ঠশিল্পী ৷
মন কৰিবলগীয়া যে, দুয়ো পৃথক ধৰ্মৰ আছিল যদিও দুয়োৰে দুই পৃথক ধৰ্মৰ প্ৰতি আছিল অগাধ ভক্তি ৷ শুকুৰবাৰে গুৱাহাটীৰ নিজা গৃহত চৈয়দা জ্যোৎস্না ৰহমানৰ মৃত্যুৰ পিছতেই তেওক লৈ অনা হয় গোলাঘাটৰ নিজৰ পিতৃৰ গৃহলৈ ৷ গোলাঘাট নগৰৰ কুমাৰপট্টীৰ মাতৃগৃহলৈ নশ্বৰ দেহ অনাৰ পিছতেই ঈছলাম ধৰ্মৰ নিয়মেৰে জ্যোৎস্না ৰহমানৰ জানাজা সম্পন্ন কৰা হয় ৷ জ্যোৎস্না ৰহমানৰ মৃত্যুত তেওঁৰ ভাতৃ, ভগ্নী সকল শোকাৰ্ত হৈ পৰাৰ লগতে দ্বীপেন বৰুৱায়ো তেওঁৰ সংসাৰৰ স্মৃতি ৰোমন্থন কৰে ৷
উল্লেখ্য যে, শুকুৰবাৰে নিশা মৃত্যুক সাৱটি লৈছিল বিশিষ্ট কণ্ঠশিল্পী গৰাকীৰ পত্নী চৈয়দা জ্যোৎস্না ৰহমানে। কিছুদিন ধৰি অসুস্থ হৈ আছি জোৎস্না ৰহমান । বাথৰুমলৈ যাওঁতে আকস্মিকভাৱে অসুস্থ হৈ মৃত্যুক সাৱটি লয় জ্যোৎস্না ৰহমান ৷
