গোলাঘাটত বজ্ৰপাতত মৃত্যু কিশোৰৰ

গোলাঘাটৰ মূৰফুলনি অঞ্চলত হঠাতে অহা ধুমুহা বৰষুণৰ ফলত বিস্তৰ ক্ষতিসাধন হয় অঞ্চলটোৰ ৷ তাৰোপৰি বজ্ৰপাতৰ ফলত এজন কিশোৰৰ মৃত্যু ঘটাৰ লগতে আহত হয় এগৰাকী মহিলা ৷ আহত মহিলাগৰাকীক সম্প্ৰতি সংকটজনক অৱস্থাত চিকিৎসালয়ত ভৰ্তি কৰোৱা হৈছে ৷

গোলাঘাট,12 মে’: মঙলবাৰে হঠাতে অহা এজাক ধুমুহা বৰষুণে বিস্তৰ ক্ষতিসাধন কৰে গোলাঘাট জিলাত ৷ জিলাখনৰ অন্তৰ্গত বগীজান থানাৰ মূৰফুলনি অঞ্চলত যথেষ্ঠ ক্ষতিসাধন হয় ধুমুহাৰ ফলত ৷ আনহাতে, মূৰফুলনিৰ দখৰা পথাৰ অঞ্চলত বজ্ৰ পৰি মৃত্যু ঘটে জয়দ্বীপ ভূমিজ নামৰ এজন কিশোৰৰ ৷ লগতে গুৰুতৰভাৱে আহত হয় এগৰাকী মহিলা ৷ আহত মহিলাগৰাকীক সংকটজনক অৱস্থাত গোলাঘাটৰ কুশল কোঁৱৰ অসামৰিক চিকিৎসালয়ত ভৰ্তি কৰোৱা হৈছে ৷ ধুমুহা-বৰষুণজাকে অঞ্চলটোৰ কেইবাটাও বাসগৃহ ভাঙি তহিলং কৰে ৷

উল্লেখ্য যে,মৃত কিশোৰজনে সেই সময়ত পথাৰলৈ গৰু আনিবলৈ গৈছিল ৷ ততাতৈয়াকৈ চিকিৎসাৰ বাবে কিশোৰজনক কুশল কোঁৱৰ অসামৰিক চিকিৎসালয়লৈ নিয়া হয় যদিও আদবাটতে মৃত্যুক সাৱটি লয় ৷ ইতিমধ্যে কিশোৰজনৰ মৃতদেহৰ মৰণোত্তৰ পৰীক্ষাৰ ব্যৱস্থা কৰা হৈছে ৷

লগতে চাওকঃ এগৰাকী অকলশৰীয়া মহিলাৰ কৰুণ কাহিনী...