গোলাঘাট, 12 এপ্ৰিল : ৰঙালী বিহুলৈ মাজত মাথো কেইটামান দিন বাকী ৷ ব’হাগৰ বিহুত বস্ত্ৰদান কৰাতো এটা পৰম্পৰা বা এক নিয়ম । বিশেষকৈ ৰঙালী বিহুত পৰিয়াল তথা ইষ্ট-কুটুম্বক একোখন বিহুৱান দিয়া প্ৰথা অতি পুৰণি ৷ সেয়ে এতিয়া ৰাজ্যৰ বজাৰত উভৈনদী হৈ পৰিছে ফুলাম গামোছাৰে ৷ অসমৰ শিপিনীয়ে হাতে বোৱা গামোছা উপলব্ধ হৈ পৰিছে বজাৰসমূহত ৷
কিন্তু ইয়াৰ মাজতেই এটা দুষ্ট চক্ৰই বজাৰত মোকলাই দিছে বহিঃৰাজ্যত উৎপাদিত গামোচা ৷ আন আন ঠাইৰ লগতে গোলাঘাটতো বহিঃৰাজ্যত উৎপাদিত গামোচা বজাৰত উভৈনদী হৈ পৰা পৰিলক্ষিত হৈছে । বহিঃৰাজ্যত উৎপাদিত গামোচাই প্ৰত্যাহ্বান কঢ়িয়াই আনিছে শিপিনীসকললৈ । বিহু আহিলেই বজাৰত মেচিনত প্ৰস্তুত কৰা গামোচা বিক্ৰী নকৰিবলৈ ব্যৱসায়ীসকলক নিৰ্দেশ দি থকাতো যেন এতিয়া একপ্ৰকাৰে নিয়মত পৰিণত হৈছে ।
যি সময়ত মুখ্যমন্ত্ৰী ড৹ হিমন্ত বিশ্ব শৰ্মাই বিহুত থলুৱা গামোচা ব্যৱহাৰ কৰিবলৈ ৰাজ্যবাসীক আহ্বান জনাইছে সেই সময়তে একাংশ ব্যৱসায়ীয়ে নিজৰ চাহিদা বৃদ্ধিৰ স্বাৰ্থত বজাৰত বিক্ৰী কৰি আহিছে বহিঃৰাজ্যত উৎপাদিত গামোচা ৷ যাৰ বাবে ৰাজ্যৰ শিপিনীসকলে অৰ্থনৈতিক সংকটত ভোগাও পৰিলক্ষিত হৈছে ৷ সেয়ে এতিয়া এই ক্ষেত্ৰত কঠোৰ ভূমিকা পালন কৰিছে ৰাজ্য চৰকাৰ তথা প্ৰশাসনে ৷ ৰাজ্যৰ ভিন্ন প্ৰান্তত জিলা প্ৰশাসনে বহিঃৰাজ্যত উৎপাদিত গামোচাৰ বিৰুদ্ধে চলাইছে অভিযান ৷
সমান্তৰালকৈ ৰাজ্যৰ ভিন্ন প্ৰান্তৰ লগতে গোলাঘাটতো বহিঃৰাজ্যত উৎপাদিত গামোচা বিক্ৰী কৰাক লৈ এতিয়া তৎপৰ হৈছে গোলাঘাট জিলা প্ৰশাসনৰ লগতে ধনশিৰি মহকুমা প্ৰশাসনো (Obstructs sale of outside made Gamusa in Golaghat) ৷ সোমবাৰে সৰুপথাৰ নগৰৰ বিভিন্ন কাপোৰৰ দোকানত গোলাঘাট জিলা প্ৰশাসনৰ লগতে ধনশিৰি মহকুমা প্ৰশাসনে অভিযান চলোৱা পৰিলক্ষিত হয় ।
ধনশিৰি মহকুমাৰ দণ্ডাধীশ প্ৰাঞ্জীল গগৈৰ নেতৃত্বত সোমবাৰে হস্ততাঁত বিভাগ, উদ্যোগ আৰু বাণিজ্য বিভাগ, সৰুপথাৰ আৰক্ষীকে ধৰি বহুকেইটা বিভাগৰ যুটীয়া অভিযান চলে সৰুপথাৰ নগৰত । অভিযানকালত কেইবাখনো দোকানত মেচিনেৰে প্ৰস্তুত কৰা গামোচা জব্দ কৰে ধনশিৰি মহকুমা প্ৰশাসনে ।
লগতে পঢ়ক : বাঁহত ওলমি বাদুলী ওলমা ছেও অনুশীলন অশীতিপৰ ওজা জয়ৰাম খঙীয়াৰ
