গোলাঘাট, 26 ছেপ্টেম্বৰ: ৰহস্যৰ আৱৰ্তত আবকাৰী চোৰাংচোৱা বিভাগৰ বিষয়াৰ পথ দুৰ্ঘটনাৰ ঘটনা ৷ গোলাঘাটৰ সাৰেঙী গাঁৱত মাজনিশা হোৱা ভয়ংকৰ পথ দুৰ্ঘটনাত ঘটনাস্থলীতে দুজনৰ মৃত্যুৰ বিপৰীতে চিকিৎসাধীন অৱস্থাত এজনৰ মৃত্যু হয় । আৱকাৰী বিভাগৰ আয়ুক্তৰ নিৰ্দেশ মৰ্মে গোলাঘাটলৈ অভিযান চলাবলৈ আহিছিল দলটো । গোলাঘাটত শেহতীয়াকৈ দেশৰ সৰ্ববৃহৎ সুৰা ট্ৰেজেদী সংঘটিত হৈছিল ৷ কিন্তু গোলাঘাটৰ মাজেৰে যোৱা 39নং ৰাষ্ট্ৰীয় ঘাইপথৰে চলি আহিছিল অৰুণাচলী সুৰাৰ ৰমৰমীয়া ব্যৱসায়ী । একাংশয়ে সন্দেহ প্ৰকাশ কৰিছে কোনো দুষ্টচক্ৰয়ে সংঘটিত কৰিছে এই দুৰ্ঘটনাটো ।
এই দুৰ্ঘটনাৰ পিছতেই বিভিন্ন ধৰণৰ সন্দেহ আৰু অভিযোগ উত্থাপিত হৈছে । সুৰাৰ অভিযান আৰু সুৰা ব্যৱসায়ীৰ তথ্য পোহৰলৈ নাহিবলৈ এই দুৰ্ঘটনা সংঘটিত কৰাৰ অভিযোগ একাংশৰ। গুৱাহাটীৰ পৰা গোলাঘাট লৈ বিশেষ অভিযানৰ বাবে আহিছিল এই আবকাৰী বিভাগৰ কৰ্মচাৰীৰ দলটো । দলটোৱে গোলাঘাট আবকাৰী বিভাগক লগত লৈ অভিযান চলোৱাৰ কথা আছিল যদিও নিশা গোলাঘাট আবকাৰী বিভাগৰ অজ্ঞাতে ওলাই গৈছিল দলটো, তাৰ পিছতেই সংঘটিত হৈছিল এই কৰুণ দুৰ্ঘটনা । ইয়াৰ মাজতে আন এক গুৰুত্বপূৰ্ণ বিষয় হ'ল, 39নং ৰাষ্ট্ৰীয় ঘাইপথৰে অবৈধ ভাৱে বালি আনিবলৈ নিশা সঘনাই চলাচল কৰে ডাম্পাৰসমুহে।
তথ্যনুসৰি, আবকাৰী চোৰাংচোৱা বিভাগৰ মুঠ 6 জন বিষয়া-কৰ্মচাৰী AS-01DJ-0801 নম্বৰৰ টাটা চুম' খনত গুৱাহাটীৰ পৰা গোলাঘাটলৈ আহিছিল ৷ তেনে সময়তে 39 নং ৰাষ্ট্ৰীয় ঘাইপথৰ সাৰেঙী গাঁৱত বিপৰীত দিশৰ পৰা অহা NL-05G-1049 নম্বৰৰ এখন ডাম্পাৰৰ সৈতে টাটা চুম' খনৰ মুখামুখি সংঘৰ্ষ হয় । এই সংঘৰ্ষৰ পাচতেই মুহুৰ্ততে টাটা চুম'খন জ্বলি যায় ৷ আৰু ইয়াৰ বিপৰীতে ডাম্পাৰ খনৰ কেৱল পাচফালৰ চকা কেইটা জ্বলে যদিও গাড়ীখন ৰক্ষা পৰে ৷ জুইত সম্পূৰ্ণ ভস্মীভূত হোৱা চুম' খনৰ ভিতৰতে ৰমেন বনজাং নামৰ এজন কনিষ্টবল অগ্নিদগ্ধ হৈ মৃত্যু হোৱাৰ লগতে আবকাৰী চোৰাংচোৱা বিভাগৰ পৰিদৰ্শক চামু মাইবঙৰ ঘটনাস্থলীতে মৃত্যু হয় ৷ আনহাতে, আবকাৰী বিভাগৰ সহপৰিদৰ্শক হৰেকৃষ্ণ কুমাৰৰ যোৰহাট চিকিৎসা মহাবিদ্যালয়ত চিকিৎসাধীন অৱস্থাত মৃত্যু হয় ৷ সম্প্ৰতি মুঠ 6 জনৰ ভিতৰত আন তিনিজন বিষয়া চিকিৎসাধীন অৱস্থাত আছে ৷ আহত লোক কেইজনৰ ভিতৰত তানু ইনজাল যোৰহাট চিকিৎসা মহাবিদ্যালয়ত চিকিৎসাধীন অৱস্থাত আছে ৷ ইপিনে জাহিদুল হক (ছিপাঝাৰ) আৰু চুমু খনৰ চালক কে ৰাহুল সিং ( শিলচৰ) গোলাঘাটৰ শ্বহীদ কুশল কোঁৱৰ অসামৰিক চিকিৎসালয়ত চিকিৎসাধীন হৈ আছে ৷
উল্লেখ্য যে, আঘাতপ্ৰাপ্ত জাহিদুল হক আৰু তনু ইনজালৰ ভাষ্য অনুসৰি, আবকাৰী আয়ুক্তৰ নিৰ্দেশ মতে দলটো যোৰহাট হৈ গোলাঘাটত উপস্থিত হৈছিল ৷ দলটোৱে গোলাঘাট আবকাৰী বিভাগৰ লগত দিনৰ 4:30 বজাত কথা পাতি নিশা এক গোপন অভিযানৰ বিষয়ে জনাইছিল আৰু গোলাঘাটৰ পৰা এটা আবকাৰী দল বিচাৰিছিল ৷ কিন্তু তেওঁলোকে বিচৰা আবকাৰী দলটোক নোলোৱাকৈয়ে গুৱাহাটীৰ দলটো গোলাঘাট আৱৰ্ত ভৱনৰ পৰা গুৱাহাটীৰ দিশে ওলাই গৈছিল । অৱশ্যে আবকাৰী বিভাগৰ চোৰাংচোৱাৰ দলটো কি বিশেষ কামত গোলাঘাটলৈ আহিছিল সেয়া এই পৰ্যন্ত স্পষ্ট হোৱা নাই ৷ একাংশই অভিযোগ কৰা অনুসৰি অবৈধ ভাৱে সৰবৰাহ হৈ থকা অৰুণাচলী সুৰাৰ বিৰুদ্ধে অভিযান চলাবলৈ আহি পৰিকল্পিত হত্যাকাণ্ডৰ বলি হ'ল এই সকল আবকাৰী বিষয়া কৰ্মচাৰী ৷ কিয়নো টাটা চুম'খন জ্বলি ভস্মীভূত হোৱাৰ বিপৰীতে ডাম্পাৰখনৰ বিশেষ একো ক্ষতি হোৱা নাই ৷ আৰু এই ঘটনাত ডাম্পাৰ খন পথাৰলৈ নামি পৰে আৰু চালক-হেণ্ডিমেনে পলায়ন কৰে ৷ ইপিনে গোলাঘাটৰ আবকাৰী দলটোক সাজু হৈ থাকিবলৈ কৈ কিয় একো কথা নজনোৱাকৈ গুৱাহাটীৰ দলটো গোলাঘাটৰ পৰা ওলাই গৈছিল সেইয়াও এতিয়া ৰহস্যৰ আৱৰ্তত ৷
শেহতীয়া তথ্য অনুসৰি, ডাম্পাৰখনৰ চালকজনক আৰক্ষীয়ে আটক কৰিবলৈ সক্ষম হৈছে ৷
