গোলাঘাট, 18 আগষ্ট : বুধবাৰে দিনজোৰা কাৰ্যসূচীৰে গোলাঘাটত উপস্থিত হ'ব মুখ্যমন্ত্ৰী ড৹ হিমন্ত বিশ্ব শৰ্মা । উজনি অসমৰ অন্যতম ধৰ্মীয় পীঠস্থান গোলাঘাটৰ শ্ৰীশ্ৰীআঠখেলীয়া নামঘৰত পবিত্ৰ ভাদ মাহৰ প্ৰথম দিনটোতে ভগৱানৰ শ্ৰীচৰণত সেৱা লব অসমৰ মুখ্যমন্ত্ৰীগৰাকীয়ে ৷ মুখ্যমন্ত্ৰীগৰাকীয়ে হেলিকপ্তাৰযোগে উপস্থিত হ'ব আঠখেলীয়া নামঘৰৰ চৌহদত ৷ বুধবাৰৰ পৰা বলৱৎ হোৱা নতুন SOP অনুসৰি 50 শতাংশ ভক্তৰ বাবে খোলা হৈছে ৰাজ্যৰ ধৰ্মীয় স্থানসমূহ ।
মুখ্যমন্ত্ৰীগৰাকীয়ে আজি বহুকেইটা গুৰুত্বপূৰ্ণ কাৰ্যসূচী ৰূপায়ণৰ উদ্দেশ্য উপস্থিত হ'ব গোলাঘাটত । বিত্ত মন্ত্ৰী অজন্তা নেওগৰ মতে, মুখ্যমন্ত্ৰীৰ গোলাঘাটলৈ আগমন জিলাবাসীৰ বাবে এটা ঐতিহাসিক দিন । কাৰ্যসূচী অনুযায়ী মুখ্যমন্ত্ৰী ড৹ হিমন্ত বিশ্ব শৰ্মাই পোনতে উপস্থিত হ’ব শ্ৰীশ্ৰী আঠখেলীয়া নামঘৰত । নামঘৰত সেৱা লোৱাৰ পাছত এক কাৰ্যসূচীত অংশগ্ৰহণ কৰিব ।
তাৰ পাছতেই বৰুৱাগাঁৱলৈ ৰাওনা হ’ব তেওঁ । বৰুৱাগাঁৱৰ পৰা বীৰাংগনা সাধনী কলাক্ষেত্ৰলৈ গৈ দিনৰ প্ৰায় 12 বজাত সতী সাধনীৰ প্ৰতিমূৰ্তি উন্মোচন কৰিব । প্ৰতিমূৰ্তি উন্মোচন কৰি কলাক্ষেত্ৰৰ প্ৰেক্ষাগৃহত এখন পৰ্যালোচনা বৈঠকত অংশগ্ৰহণ কৰিব মুখ্যমন্ত্ৰীগৰাকী । দিনৰ 1 বজাত গোলাঘাট জিলাৰ বিজেপিৰ নৱনিৰ্মিত মুখ্য কাৰ্যালয় মুকলি কৰিব । মুখ্যমন্ত্ৰীগৰাকীয়ে জিলাখনত স্থাপন হ'বলগীয়া সতী সাধনী বিশ্ববিদ্যালয় আৰু গোলাঘাট চিকিৎসা মহাবিদ্যালয়ৰ প্ৰস্তাৱিত স্থানো পৰিদৰ্শন কৰিব ।
লগতে পঢ়ক: পুনৰ আজিৰে পৰা মুকলি মাজুলী-যোৰহাট সংযোগী ফেৰী সেৱা
