গোলাঘাট,8 আগষ্টঃ গোলাঘাটৰ 39 নং ৰাষ্ট্ৰীয় ঘাই পথত গজৰাজৰ সমদল। নিশা হ'লেই গঞাৰ নিদ্ৰা হৰণ কৰে বন্যহস্তীৰ দলে ৷ প্ৰায় 70 -80টা হাতীৰ এটা জাকে গোলাঘাট দেওপাহাৰৰ মাজেৰে যোৱা 39 নং ৰাষ্ট্ৰীয় ঘাইপথেদি পাৰ হৈ দেওপাহাৰত প্ৰৱেশ কৰিছে ৷ এই হাতীৰ বৃহৎ জাকটোত কেবাটাও পোৱালীও আছে ৷ ইফালে নুমলীগড়ৰ সমীপৰ বকিয়াল চাহ বাগিচাৰ কাষত অৱস্থান কৰি থকা পোৱালিসহ বৃহৎ হাতীৰ জাকটোৱে নিশা হ'লেই কাষৰ গাওঁ সমূহত প্ৰৱেশ কৰি তাণ্ডৱৰ সৃষ্টি কৰে।
গোলাঘাটত বন্যহস্তীৰ তাণ্ডৱ
ইফালে হাতীৰ জাকটোৱে বিচৰণ কৰি থকাৰ বাবে দিন দুপৰতে দৈনিক বজাৰ সমাৰ কৰিবলৈ অহা যোৱা কৰাৰ লগতে ঘৰৰ পৰা ওলাবলৈ ভয় খাইছে জনসাধাৰণ । বিপৰীতে বকিয়াল খণ্ড বন বিষয়াৰ দলে হাতী খেদাত ব্যৰ্থ হোৱাৰ অভিযোগ স্থানীয় ৰাইজৰ। উল্লেখ্যে যে দীর্ঘদিনধৰি গোলাঘাটৰ বিভিন্ন অঞ্চলত বন্য হস্তীৰ জাকটোৱে বহু পৰিয়ালৰ ঘৰ-বাৰী ভাঙি তহিলং কৰি আহিছে ৷
