ডিজিটেল ইণ্ডিয়াৰ মেৰুদণ্ডবিহীন এটা অঞ্চল

যি সময়ত কেন্দ্ৰীয় চৰকাৰে ডিজিটেল ইণ্ডিয়াৰ কথা কৈছে তেনে সময়তে একাংশ লোকে নিজকে মেৰুদণ্ডবিহীন বুলি উল্লেখ কৰিছে ৷ আচহুৱা যেন লাগিলেও এই কথাই সত্য যে, অসম-মেঘালয় সীমান্তৱৰ্তী অসমৰ দুধনৈ সমষ্টিতে আছে এনেকুৱা এটা বাণিজ্যিক ঘাটি যি ক্ৰমাৎ মৃত্যুৰ মুখলৈ গতি কৰিছে ৷

গোৱালপাৰা, 11 চেপ্তেম্বৰঃ চৰকাৰী উন্নয়নে চুবলৈ সক্ষম নোহোৱা অসমৰ এটা বৃহত্তৰ অঞ্চল ৷ যিটো অঞ্চল এসময়ত অসমৰ অন্যতম বাণিজ্যিক ঘাটি আছিল, য'ৰ পৰা বাহিৰলৈ অসমৰ থলুৱা সামগ্ৰী ৰপ্তানি হৈছিল ৷ কিন্তু সেই অঞ্চলবাসীয়ে সংবাদ মাধ্যমৰ আগত বৰ্তমান নিজকে মেৰুদণ্ডবিহীন বুলি আক্ষেপেৰে উল্লেখ কৰিছে ৷ বৰ্তমান সময়ত অঞ্চলটোত বিদ্যুতৰ পৰা আৰম্ভ কৰি স্বাস্থ্য তথা যোগাযোগ ব্যৱস্থাৰ বাবে নাই কোনো আধুনিক সুবিধা ৷ ডিজিটেল ইণ্ডিয়াৰ কথা কোৱা খোদ বিজেপি চৰকাৰৰ এগৰাকী বিধায়ক থকাৰ পিচটো অঞ্চলবাসীয়ে বৰ্তমানে বিভিন্ন সমস্যাৰ মাজেৰে দৈনন্দিন জীৱন পাৰ কৰিবলগীয়া হৈছে ৷

অসম-মেঘালয় সীমান্তৰ গোৱালপাৰা জিলাৰ দুধনৈ সমষ্টিৰ এই বাণিজ্যিক ঘাটিটো হৈছে মেন্দীপথাৰ ৷ এটা সময়ত গাৰো আৰু অসমীয়াৰ মাজত সমন্বয় গঢ়ি তুলিছিল এই বজাৰখনে ৷ বজাৰখনৰ লগতে গাৰো আৰু অসমীয়াসকলৰ মাজত হোৱা সকলোধৰণৰ যোগাযোগ ব্যৱস্থাৰ একমাত্ৰ উপায় আছিল কৃষ্ণাইৰ পৰা মেন্দীপথাৰ সংযোগী ৰাষ্ট্ৰীয় ঘাইপথটো ৷ কিন্তু এই পথটোৰ বৰ্তমানৰ অৱস্থাৰ বাবেই এতিয়া একপ্ৰকাৰে সকলোফালৰ পৰা বঞ্চিত হৈ পৰিছে সমগ্ৰ মেন্দীপথাৰ অঞ্চলবাসী ৷ স্থানীয় ৰাইজৰ অভিযোগ অনুসৰি একেবাৰে জৰাজীৰ্ণ হৈ পৰা পথচোৱা বিগত বৰ্ষসমূহত কোনোখন চৰকাৰেই মেৰামতিৰ ব্যৱস্থা নকৰিলে ৷ পথটোৰ লগতে, সমগ্ৰ মেন্দীপথাৰ অঞ্চলবাসীয়ে লাভ কৰা নাই অসম চৰকাৰৰ কোনোধৰণৰ আঁচনিৰ সুবিধা ৷ বিদ্যুৎ যোগানৰ পৰা ধৰি বিদ্যালয় তথা স্বাস্থ্য আৰু অন্যান্য লাগতিয়াল সেৱাসমূহ একপ্ৰকাৰ স্তব্ধ হৈ পৰিছে অঞ্চলটোত ৷ অসমৰ অংগ হৈয়ো অঞ্চলবাসীয়ে মেঘালয়ৰ পৰা ক্ৰয় কৰি আহিছে বিদ্যুৎ তথা খোৱাপানী ৷ ইয়াৰ বাবে মেঘালয় চৰকাৰে অঞ্চলবাসীৰ পৰা গ্ৰহণ কৰি আহিছে অতিৰিক্ত মাচুল ৷ ইয়াৰ উপৰিও অঞ্চলটোত নাই কোনো অগ্নিনিৰ্বাপক বাহিনীকে ধৰি এম্বুলেন্স সেৱা ৷

ৰাইজৰ অভিযোগ, পৰিৱৰ্তনৰ শ্লোগান দিয়া দুধনৈ সমষ্টিৰ বিজেপি বিধায়ক দীপক ৰাভাৰ সমষ্টিবাসীৰ সমস্যাৰ প্ৰতি নাই তিলমাত্ৰ গুৰুত্ব ৷ কেন্দ্ৰ আৰু ৰাজ্যত নিজ দলৰ চৰকাৰ থকাৰ পিছটো মেন্দীপথাৰবাসীয়ে এতিয়া বহিঃৰাজ্যৰ সৈতে একপ্ৰকাৰ যোগাযোগ বিহীনভাৱে দিন পাৰ কৰিছে ৷ যি সময়ত কেন্দ্ৰীয় চৰকাৰে অৰ্থনীতিকে ধৰি বজাৰ আৰু অন্যান্য সামগ্ৰী তথা সেৱাগত দিশসমূহৰ দ্ৰুত উন্নয়নৰ বাবে ইখনৰ পিচত সিখন আঁচনিৰ ঢাক-ঢোল বজাইছে তেনে সময়তে মেন্দীপথাৰবাসীয়ে আক্ষেপেৰে নিজকে মেৰুদণ্ডবিহীন বুলি উল্লেখ কৰিছে ৷ পৰিৱৰ্তনৰ শ্লোগান দিয়া চৰকাৰখনে উন্নয়ন সাধিবলৈ সক্ষম নহ'লেও অঞ্চলটোলৈ এবাৰ চকু মেলি চাবলৈ অনুৰোধ জনাইছে সমগ্ৰ মেন্দীপথাৰবাসীয়ে ৷