গোৱালপাৰা,23নৱেম্বৰ : বৰপেটাৰ জলজলী নদীৰ ওপৰত নিৰ্মাণ কৰা হ'ল ৬০০ ফুট দৈঘ্যৰ এখন বাঁহ-কাঠৰ দলং। দলংখনৰ নাম ৰখা হৈছে ডঃ এ পি জে আব্দুল কালাম ৷ স্বাধীনতাৰ ৭২ বছৰ অতিক্ৰম কৰাৰ পিছত দক্ষিণ বৰপেটা আৰু কামৰূপ জিলাক সংযোগ কৰিব এই দলংখনে ৷ অঞ্চলবাসীয়ে প্ৰায় ২০ বছৰ ধৰি জলজলী নদীৰ ওপৰত এখন পকী দলং নিৰ্মাণৰ বাবে দাবী জনায় আহিছে ৷ কিন্তু সময়ে-সময়ে চৰকাৰ সলনি হৈ প্ৰতিশ্ৰুতিবোৰো সলনি হৈ গৈছে ৷ প্ৰায় ৪০ খন গাঁৱৰ লক্ষাধিক লোকে বহুবাৰ দাবী জনায় আহিছে যদিও বৰ্তমানেও উক্ত স্থানত নিৰ্মাণ হোৱা এখন পকী দলং ৷
অৱশেষত অঞ্চলবাসী উপায়ন্তৰ হৈ ছাইদুৰ ৰহমানৰ সহযোগত বৰপেটাৰ কালাইৰদিয়া,মাজৰচৰ আৰু নগৰবেৰাৰ একাংশ যুৱকে নিৰ্মাণ কৰি উলিয়ালে এই বৃহৎ বাঁহ-কাঠৰ দলঙখন ৷ ৫ লক্ষাধিক টকা ব্যয় কৰি নিৰ্মাণ কৰা দলংখন শনিবাৰে আনুষ্ঠানিক ভাৱে মুকলি কৰে কালাইৰদিয়া গাঁৱৰ সমাজকৰ্মী নুৰ মহম্মদ আলীয়ে। ইফালে,দক্ষিণ বৰপেটা আৰু নগৰবেৰাক সংযোগ কৰি নিৰ্মাণ কৰা বাঁহ-কাঠৰ দলঙখনক লৈ উৎফুল্লিত হৈ পৰে অঞ্চলবাসী ৷ অঞ্চলবাসীৰ মত,দীৰ্ঘদিনে যাতায়তৰ বাবে যন্ত্ৰণা ভুগি অহা অঞ্চলবাসী এতিয়া যাতায়তৰ ক্ষেত্ৰত বহুখিনিয়ে সকাহ পাব ৷
লগতে চাওকঃজনজাতি সংশোধনী আইন ২০১৯ বাতিলৰ দাবীত ৰাজ্যজুৰি প্ৰতিবাদ
