ডিমা হাছাও, 25 জানুৱাৰী : হাফলঙত সোমবাৰে পালন কৰা হয় ৰাষ্ট্ৰীয় ভোটাৰ দিৱস । হাফলং জিলা উপায়ুক্ত কাৰ্যালয়ৰ সভা কক্ষত যি সকল নতুন ভোটাৰৰ ভোটাৰ লিষ্টত নাম অন্তৰ্ভুক্ত হৈছে এই ভোটাৰ সকলক সম্বৰ্ধনা প্ৰদান কৰি এখন চাৰ্টিফিকেট প্ৰদান কৰে জিলা উপায়ুক্ত পল বৰুৱাই ।
ভোটাৰ দিৱসৰ এই অনুষ্ঠানত জিলা উপায়ুক্তৰ লগতে উপস্থিত আছিল অতিৰিক্ত জিলা উপায়ুক্ত দীপক জিদোং, ইলেকচন অফিচাৰ হেমাংগ নবিচ আৰু নতুনকৈ ভোটাৰ লিষ্টত অন্তৰ্ভুক্ত হোৱা ভোটাৰ সকল । ইপিনে, জিলা উপায়ুক্ত পল বৰুৱাই সাংবাদিকৰ আগত কয় যে, ডিমা হাছাও জিলাত 18 নৱেম্বৰৰ 2020 লৈকে ভোটাৰ তালিকাত নাম আছিল 1 লাখ 42 হাজাৰ 529 গৰাকী ভোটাৰৰ ।
কিন্তু এতিয়া নতুন ভোটাৰ তালিকাত নাম সন্নিবিষ্ট হৈছে 3654 গৰাকী ভোটাৰৰ নাম । এতিয়া ডিমা হাছাও জিলাৰ মুঠ ভোটাৰৰ সংখ্যা বৃদ্ধি হৈ হৈছে 1 লাখ 46 হাজাৰ 183 গৰাকী যাৰ মাজত পুৰুষ ভোটাৰৰ সংখ্যা হৈছে 73 হাজাৰ 463 আৰু মহিলা ভোটাৰৰ সংখ্যা হৈছে 72 হাজাৰ 720 । লগতে, ডিমা হাছাও জিলাত কোনো ডি ভোটাৰৰ সমস্যা নাই বুলি সাংবাদিকৰ আগত মন্তব্য কৰে জিলা উপায়ুক্ত পল বৰুৱাই ।
লগতে পঢ়ক : ২৭ জানুৱাৰীত আমগুৰিত অগপৰ জাতীয় ঐক্য সমাৰোহ
