ডিমা হাছাও, 5 জুলাই : কেন্দ্ৰ আৰু ৰাজ্য চৰকাৰৰ চৰম উদাসীনতাৰ বাবে শোচনীয় হৈ পৰিছে 27 নম্বৰ ৰাষ্ট্ৰীয় ঘাইপথ । বৰাক উপত্যকা ডিমা হাছাও ত্ৰিপুৰা মণিপুৰ মিজোৰামৰৰ বাবে অতি গুৰুত্বপূৰ্ণ 27 নম্বৰ ৰাষ্ট্ৰীয় ঘাইপথৰ অৱস্থা অতি বেয়াকৈ অৱস্থাত পৰিণত হৈছে । কিন্তু এই ঘাইপথ মেৰামতিৰ বাবে কেন্দ্ৰ আৰু ৰাজ্য চৰকাৰে ইমান গুৰুত্ব দিয়া নাই বুলি অভিযোগ উত্থাপন হৈছে ।
শিলচৰ-গুৱাহাটীৰ মাজৰ 27 নম্বৰ ৰাষ্ট্ৰীয় ঘাইপথ মেৰামতিৰ বাবে কেন্দ্ৰীয় পথ পৰিবহণ মন্ত্ৰণালয়ে 54 কোটি টকা মুকলি কৰি দিয়াৰ পিচতো এই ৰাষ্ট্ৰীয় ঘাইপথ মেৰামতিৰ ক্ষেত্ৰত বিলম্ব হৈছে । এই ৰাষ্ট্ৰীয় ঘাইপথৰ হাফলং আৰু শিলচৰৰ মাজতে জাতিংগাৰ পৰা হাৰেংগাজাও পৰ্যন্ত 25 কিলোমিটাৰ অংশ মেৰামতিৰ দায়িত্ব দিয়া হৈছিল ৰত্না ইনফ্ৰা প্ৰাইভেট লিমিটেড নামৰ এটা নিৰ্মাণকাৰী সংস্থাক ৷ কিন্তু এই নিৰ্মাণ সংস্থাটোৱে নিজে কাম নকৰি ঠিকাভিত্তিক লক্ষ্মী মটৰচ নামৰ শিলচৰৰ এটা সংস্থাক পথ মেৰামতিৰ কামত নিয়োজিত কৰে ৷
ৰাষ্ট্ৰীয় ঘাইপথ প্ৰাধিকৰণৰ লগত মিতিৰালি কৰি এই সংস্থাটোৱে ব্যাপক দুৰ্নীতি সংগঠিত কৰি অহাৰ বাবে এই পথছোৱাৰ অৱস্থা শোচনীয় হৈ পৰিছে বুলি অভিযোগ উত্থাপন হৈছে । একমাত্ৰ চৰকাৰৰ সদিচ্ছাৰ অভাৱত এই ৰাষ্ট্রীয় ঘাইপথৰ এই অৱস্থা বুলি অভিযোগ উত্থাপন কৰিছে তেজপুৰৰ পৰা শিলচৰ অভিমুখে যোৱা এগৰাকী ট্ৰাকৰ চালকে । এই ৰাষ্ট্ৰীয় ঘাইপথটোৰ অৱস্থা অতি বেয়া হোৱাৰ বাবে প্ৰায় সময়ত পথৰ মাজতে ট্ৰাক আৱদ্ধ হৈ পৰে ৷
ট্ৰাকখন উঠোৱাৰ বাবে ট্ৰাকচালকে দুই হাজাৰৰ পৰা 2,500 টকা দিব লগীয়া হয় চালক জনে জানিবলৈ দিয়ে ৷ তেওঁ বিগত বাৰ বছৰে ৰাষ্ট্ৰীয় ঘাইপথটো একে অৱস্থাতেই প্ৰত্যক্ষ কৰাৰ কথা জানিবলৈ দিয়ে । উল্লেখ্য যে, পৰিবৰ্তনৰ কথা কৈ কেন্দ্ৰত শাসনত আহিছিল মোদী চৰকাৰ ৷ এবাৰ নহয় দুবাৰকৈ কেন্দ্ৰত মোদী চৰকাৰ শাসনত অহাৰ পিচতে ৰাষ্ট্ৰীয় ঘাইপথৰ অৱস্থাৰ কোনো পৰিৱৰ্তন হোৱা নাই ৷
এই অৱস্থাত নগাঁও গুৱাহাটী যোৰহাট তেজপুৰৰ পৰা শিলচৰ যোৱাৰ বাবে এদিনৰ ঠাইত দুই তিনিদিন সময় লাগে । ৰাষ্ট্ৰীয় ঘাইপথটোৰ বিধ্বস্ত অৱস্থাৰ বাবে বহু সময় পথৰ মাজতে গাড়ী আৱদ্ধ হৈ পৰে । যাৰ বাবে বহু সমস্যাত পৰিব লগা হয় চালকসকল ৷ অনতিপলমে এই 27 নম্বৰ ৰাষ্ট্ৰীয় ঘাইপথ মেৰামতি কৰি চলাচলৰ উপযোগী কৰি তোলাৰ বাবে চৰকাৰক দাবী জনাইছে ভুক্তভোগী চালকসকলে ।
লগতে পঢ়ক : ৰোগীৰ blood test ৰ নামত ভূৱা ৰিপ’ৰ্ট প্ৰদানৰ অভিযোগ
