ডিমা হাছাও,1 জুন: কৰ’ণাৰ ভয়াৱহতাৰ প্ৰতি লক্ষ্য ৰাখি সোমবাৰে হাফলং অসামৰিক চিকিৎসালয়ত এটা নতুন ক’ভিড কেয়াৰ চেণ্টাৰ মুকলি কৰা হয় ৷ চেণ্টাৰটো মুকলি কৰে উত্তৰ কাছাৰ পাৰ্বত্য স্বায়ত্ব শাসিত পৰিষদৰ অধীনত থকা কাৰ্যনিৰ্বাহক সদস্য চেমুৱেল চাংছনে ।
ক’ভিড চিকিৎসা কেন্দ্ৰটো উদ্বোধন কৰি চেমুৱেল চাংছনে কয় যে, যোৱা এক সপ্তাহত ডিমা হাছাওত কৰ'ণা আক্ৰান্ত ৰোগীৰ সংখ্যা ব্যাপক হাৰত বৃদ্ধি পাইছে ৷ যাৰ বাবে হাস্পতালত ৰোগীৰ সংখ্যাও বৃদ্ধি পাইছে ৷ সেয়ে হাফলং অসামৰিক চিকিৎসালয়ৰ ক’ভিড ৱাৰ্ডত ৰোগীৰ বাবে বিচনাৰ সমস্যা হোৱাত ৰোগীসকলক ৱাৰ্ডৰ বাহিৰত ৰাখিবলগা হৈছে ।
চেমুৱেলে জিলাখনত 1,410 গৰাকী লোক বৰ্তমানলৈকে কৰ’ণাত আক্ৰান্ত হৈ থকা বুলি প্ৰকাশ কৰে ৷ সম্প্ৰতি জিলাখনত 899 গৰাকী ৰোগী সক্ৰিয় হৈ আছে আৰু 820 গৰাকী ৰোগী হোম আইচ'লেচনত আছে বুলি কয় । চেমুৱেল চাংছনে যোৱা তিনি দিনত 3 গৰাকী ৰোগীৰ মৃত্যু হোৱা বুলি সদৰী কৰে ।
জিলাৰ গাঁৱসমূহত এতিয়া গণ সংক্ৰমণ আৰম্ভ হৈছে । যাৰ বাবে টীকাকৰণৰ ব্যৱস্থা কৰা হৈছে । তেওঁ কয় যে, স্বাস্থ্য বিভাগৰ টীকাকৰণৰ টাৰ্গেট হৈছে 1 লাখ 45 হেজাৰ, এতিয়ালৈকে 40 হাজাৰ টীকাকৰণ সম্পূৰ্ণ হৈছে । জিলাখনত বৰ্তমান স্বাস্থ্য বিভাগৰ হাতত 2,400 ড’জ কৰ’ণা প্ৰতিষেধক মজুত আছে বুলি জানিবলৈ দিয়ে চেমুৱেল চাংছনে ।
লগতে পঢ়ক : ৪৫-৬০ বছৰীয়া লোকৰ টীকাকৰণঃ দেশৰ ভিতৰতে শীৰ্ষত আছে ত্ৰিপুৰা
