ধৰ্ষণকাৰীক তীব্ৰ গৰিহণা ডিমা হাছাও মুছলিম ওৱেলফেয়াৰ চ'ছাইটিৰ

হাফলংত সংঘটিত হোৱা 16 বছৰীয়া যুৱতীক ধর্ষণৰ ঘটনাক তীব্ৰ গৰিহণা ডিমা হাছাও মুছলিম ওৱেলফেয়াৰ চ'ছাইটিৰ ৷ ধর্ষণৰ ঘটনাত জড়িত অকতাৰ খানৰ কঠোৰ শাস্তিৰো দাবী সংগঠনটোৰ

ডিমা হাছাও, 24 আগষ্টঃ হাফলংত সংঘটিত হোৱা 16 বছৰীয়া যুৱতীক ধর্ষণৰ ঘটনাক তীব্ৰ গৰিহণা ডিমা হাছাও মুছলিম ওৱেলফেয়াৰ চ'ছাইটিৰ ৷ শুকুৰবাৰে হাফলংত সংবাদমেল পাতি মুছলিম ওৱেলফেয়াৰ চ'ছাইটিৰ সভাপতি চামচুল অলমে কয় যে ধর্ষণৰ অভিযুক্ত অকতাৰ খান ওৰফে বাপন খানক মুছলিম সমাজৰ পৰা বহিস্কাৰ কৰা হৈছে ৷ উক্ত সংবাদমেলতে চামচুল অলমে যোৱা দেওবাৰে হাফলং চহৰত 16 বছৰীয়া যুৱতীৰ লগত হোৱা ধর্ষণৰ ঘটনাত জড়িত অকতাৰ খানৰ কঠোৰ শাস্তিৰো দাবী জনায় ৷ ইয়াৰ লগতে এই ঘটনাৰ লগত জড়িত ধর্ষণকাৰীক দুই ঘণ্টাৰ ভিতৰত গ্ৰেপ্তাৰ কৰাৰ কাৰণে হাফলং আৰক্ষীকো ধন্যবাদ জনায় ৷

সংবাদমেলত চামচুল অলমে আৰু কয় যে কেতিয়াবা যদি অকতাৰ খান জেলৰ পৰা মুক্তি লাভ কৰে তাৰ পিছত এই লম্পটক ডিমা হাছাও জিলাৰ পৰা বহিস্কাৰ কৰা হ’ব ৷ ধর্ষণকাৰীক মুছলিম সমাজে কোন ধৰণৰ সাহায্য সহযোগিতা নকৰে ৷ আনহাতে অকতাৰ খানৰ পিতৃয়েও নিজৰ লৰাৰ এই কুকৰ্মৰ কাৰণে কঠোৰ শাস্তিৰ দাবী জনায় ৷