ডিমা হাছাও, 3 মে: ডিমা হাছাও জিলাত আৰু 5 গৰাকী ব্যক্তি কৰ'ণা ভাইৰাছত আক্ৰান্ত। চেন্নাইৰ পৰা অহা 7 গৰাকী ব্যক্তিৰ দেহত বুধবাৰে ধৰা পৰে কৰ'ণা ভাইৰাছৰ উপস্থিতি। এই লৈ ডিমা হাছাও জিলাত কৰ'ণা ভাইৰাছত আক্ৰান্ত ৰোগীৰ সংখ্যা 13 জনালৈ বৃদ্ধি হৈছে। আজি আক্ৰান্ত 5 গৰাকী ৰোগী চেন্নাইৰ পৰা হাফলং আহিছিল আৰু এই ব্যক্তি সকলক জিলাৰ বিভিন্ন কোৱাৰেন্টাইন চেণ্টাৰত ৰখা হৈছিল । হাফলঙৰ জয়শ্ৰী হোটেল, জৱাহৰ নৱোদয় বিদ্যালয় আৰু মাহুৰ চৰকাৰী উচ্চ মাধ্যমিক বিদ্যালয়ৰ কোৱাৰেন্টাইন চেণ্টাৰত থকা 5 গৰাকী ব্যক্তিৰ দেহত ধৰা পৰে কৰ'ণা ভাইৰাছৰ উপস্থিতি।
আনহাতে পূৰ্বে কৰ'ণা ভাইৰাছত আক্ৰান্ত 7 গৰাকী ব্যক্তিৰ দ্বিতীয় আৰু তৃতীয় কৰ'ণা টেষ্টৰ ৰিপোৰ্ট নিগেটিভ অহাৰ বাবে আজি এই 7 গৰাকী ৰোগীক হাফলং অসামৰিক হাস্পতালৰ পৰা ঘৰলৈ যাবলৈ দিয়া হয়।
ইপিনে ডিমা হাছাও জিলাত নতুনকৈ 5 গৰাকী ব্যক্তি কৰ'ণাত আক্ৰান্ত হ'লেও বহি:ৰাজ্যৰ পৰা অহা আন 38 গৰাকী ব্যক্তিৰ কৰ'ণা টেষ্টৰ ৰিপোৰ্ট নিগেটিভ আহে বুলি স্বাস্থ্য বিভাগৰ পৰা জানিবলৈ দিয়ে। কৰ'ণা ভাইৰাছত আক্ৰান্ত মুঠ 13 গৰাকী ৰোগীৰ ভিতৰত 7 গৰাকী ব্যক্তি সুস্থ হৈ উঠাৰ ফলত বুধবাৰে ঘৰলৈ উভতি যোৱাৰ বিপৰীতে 5 গৰাকী ৰোগী হাফলং অসামৰিক হাস্পতালত ভৰ্তি হয় আৰু এগৰাকী ৰোগী শিলচৰ চিকিৎসা মহাবিদ্যালয়ত চিকিৎসাধীন হৈ আছে।
লগতে চাওকঃ সনাতন ডেকাৰ ঘৰত উপস্থিত কৃষি মন্ত্ৰী অতুল বৰা
