মৰাণ, 12 আগষ্ট : অলিম্পিকত পদক লাভ কৰি দেশৰ লগতে ৰাজ্যলৈ গৌৰৱ কঢ়িয়াই অনা বক্সাৰ লাভলীনা বৰগোঁহাই নিজ গৃহ ৰাজ্যত উপস্থিত হোৱাৰ লগে লগেই মৰাণৰ ৰাইজৰ মাজত আনন্দ উল্লাস দেখা পোৱা গৈছে । বুধবাৰে মৰাণৰ চিত্ৰশিল্পী কুণাল বাৰ্মা আৰু নিৰ্জা গগৈয়ে মৰাণ টাউনৰ মহিলা মহাবিদ্যালয়ৰ পথৰ কাষৰ পকী দেৱালত লাভলীনা বৰগোঁহাইৰ ছবি অংকন কৰি বক্সাৰগৰাকীক শুভেচ্ছা জনায় ৷
বৃহস্পতিবাৰে লাভলীনা বৰগোঁহাই গুৱাহাটীত উপস্থিত হোৱাৰ পাচতে লাভলীনাৰ ছবিলৈ ফুল ছটিয়াই মৰাণৰ দল-সংগঠনৰ লগতে ৰাইজে লাভলীনা বৰগোঁহাইক গৃহ ৰাজ্যলৈ আদৰণি জনোৱাৰ লগতে শুভেচ্ছা জ্ঞাপন কৰে । আহোম জাতীয় গণ মঞ্চ, সদৌ তাই আহোম ছাত্ৰ সন্থা, চুতীয়া ছাত্ৰ সন্থা আদিকে কৰি মৰাণৰ দল-সংগঠনৰ প্ৰতিনিধিৰ উপস্থিতিত অনুষ্ঠিত হয় লাভলীনা বৰগোঁহাইৰ আদৰণি অনুষ্ঠান ।
এই অনুষ্ঠানতে পকী দেৱালত লাভলীনা বৰগোঁহাইৰ ছবি অংকন কৰা চিত্ৰশিল্পী কুণাল বাৰ্মা আৰু নিৰ্জা গগৈকো সম্বৰ্ধনা জনোৱা হয় ।
উল্লেখ্য যে, বৃহস্পতিবাৰে পুৱা লোকপ্ৰিয় গোপীনাথ বৰদলৈ আন্তৰ্জাতিক বিমানবন্দৰত উপস্থিত হোৱাৰ লগে লগে বক্সাৰগৰাকীক উষ্ম আদৰণি জনোৱা হয় ৷ লাভলীনাক শুভেচ্ছা জনোৱাৰ বাবে মুখ্যমন্ত্ৰী ড৹ হিমন্ত বিশ্ব শৰ্মাও বিমানবন্দৰত উপস্থিত হয় ৷ আজি বিয়লি ৰাজ্য চৰকাৰৰ উদ্যোগত ভাৰত গৌৰৱ লাভলীনাক শ্ৰীমন্ত শংকৰদেৱ কলাক্ষেত্ৰত সম্বৰ্ধনা জ্ঞাপন কৰা হ'ব ৷ সন্ধিয়া ৰাজ্যপালেও বক্সাৰগৰাকীক ৰাজভৱনত সম্বৰ্ধনা জ্ঞাপন কৰে ৷
লগতে পঢ়ক : গুৱাহাটীত উপস্থিত অসম কন্যা লাভলীনা...
