মৰাণ, ১৫ মে': বৰ্তমান ৰাজ্যত ক'ভিড-১৯ৰ সৰ্বাধিক সংক্ৰমণ হোৱা জিলাৰ তালিকাত কামৰূপ মহানগৰৰ পিছতে আছে ডিব্ৰুগড় জিলা । প্ৰতিদিনে ডিব্ৰুগড়ত বৃদ্ধি পাইছে আক্ৰান্তৰ সংখ্যা ।
সেয়ে, সংক্ৰমণ ৰোধৰ বাবে জিলা প্ৰশাসনে কঠোৰ ব্যৱস্থা গ্ৰহণ কৰাৰ লগতে ৰাইজক সজাগ কৰাৰো প্ৰয়াস কৰিছে । সম্প্ৰতি প্ৰশাসনৰ এই প্ৰচেষ্টাৰ ইতিবাচক ফলাফল দেখা গৈছে টীকাকৰণ কেন্দ্ৰসমূহত ।
প্ৰথম অৱস্থাত জিলা প্ৰশাসন আৰু স্বাস্থ্য বিভাগে আহ্বান জনোৱাৰ পাছতো ৰাইজে প্ৰতিষেধক গ্ৰহণ কৰাৰ বাবে আগবাঢ়ি অহা নাছিল । কিন্তু এতিয়া টীকাকৰণ কেন্দ্ৰসমূহত বিপৰীত ছবি পৰিলক্ষিত হৈছে ।
ডিব্ৰুগড় জিলা প্ৰশাসন আৰু স্বাস্থ্য বিভাগৰ উদ্যোগত ক'ভিড-১৯ সংক্ৰমণ প্ৰতিৰোধ কৰাৰ পদক্ষেপ হিচাপে অধিক তৎপৰতাৰে জিলাখনৰ বিভিন্ন টীকাকৰণ কেন্দ্ৰত ৪৫ বছৰ উৰ্দ্ধৰ লোকৰ লগতে ১৮-৪৪ বছৰ বয়সৰ লোকসকলক ক'ভিডৰ প্ৰতিষেধক প্ৰদানৰ ব্যৱস্থা কৰিছে ।
প্ৰতিদিনে জিলাখনৰ বিভিন্ন প্ৰান্তৰ টীকাকৰণ কেন্দ্ৰসমূহত প্ৰতিষেধক গ্ৰহণ কৰিবলৈ ৰাইজে পুৱাৰ পৰাই ভিৰ কৰা পৰিলক্ষিত হৈছে ।
ব্যতিক্ৰম নহয়, জিলাখনৰ চাহ বাগিচাৰত স্থাপন কৰা টীকাকৰণ কেন্দ্ৰসমূহো । বাগিচা এলেকাৰ লোকসকলেও প্ৰতিষেধক ল'বলৈ এতিয়া আগবাঢ়ি অহা পৰিলক্ষিত হৈছে ।
