ডিব্ৰুগড়, 22 আগষ্টঃ জনাঞ্চলত আৱিৰ্ভাৱ হোৱা এটা নাহৰফুটুকী বাঘক লৈ ডিব্ৰুগড় চহৰত বৃহস্পতিবাৰে ওৰেটো দিন উত্তেজনাই বিৰাজ কৰে৷ চহৰখনৰ মাজমজিয়াৰ পাঁচআলিত হঠাৎ বনাঞ্চলৰ পৰা আহি উপস্থিত হোৱা নাহৰফুটুকীটোক দেখা পাই সমগ্ৰ অঞ্চলটোত সৃষ্টি হয় হুৱা-দুৱাৰ ৷ জনসমাগমত আতংকিত হৈ বাঘটোৱে ৰমেন ঘোষ নামৰ এজন লোকৰ ঘৰত কোনো নথকা অৱস্থাত এখন খিৰিকীৰে প্ৰৱেশ কৰি আশ্ৰয় গ্ৰহণ কৰে । আৰক্ষী আৰু বন বিভাগৰ লোকে নাহৰফুটুকীটোক পিঞ্জৰাবদ্ধ কৰিবলৈ কেইবাবাৰো চেষ্টা কৰি ব্যৰ্থ হয় ৷ অৱশেষত তিনিচুকীয়া গুইঁজানৰ পৰা বাঘ ট্ৰেংকুইলাইজ কৰাৰ বাবে বিশেষজ্ঞ দল আহি দুপৰীয়া প্ৰায় দুই বজাত পাঁচআলিত উপস্থিত হয়।
পশু চিকিৎসক খনিন চাংমাই নেতৃত্বত অহা বিশেষজ্ঞ দলে অৱশেষত বিয়লি প্ৰায় 4 বাজি 30 বজাত নাহৰফুটুকীটোক অচেতন কৰিবলৈ সক্ষম হয় । আনহাতে ডিব্ৰুগড় জিলাৰ বিভিন্ন বাগান আৰু গ্ৰাম্য অঞ্চলত বাঘৰ সচৰাচৰ বিচৰণ পৰিলক্ষিত হোৱাৰ পাছতো ডিব্ৰুগড় জিলা বন বিভাগৰ হাতত বাঘক অচেতন কৰা ট্ৰেংকুইলাইজাৰ নথকাৰ বাবে স্থানীয় ৰাইজে তীব্ৰ প্ৰতিক্ৰিয়া প্ৰকাশ কৰিছে ।
