ডিব্ৰুগড়ত প্ৰশাসনৰ উচ্চ পৰ্যায়ৰ পৰ্যালোচনা বৈঠক

ডিব্ৰুগড়ত অনুষ্ঠিত উচ্চ পৰ্যায়ৰ এক পৰ্যালোচনা সভা । ডিব্ৰুগড় জিলা উপায়ুক্ত কাৰ্যালয়ৰ সভাগৃহত অনুষ্ঠিত হয় উক্ত সভাখন ৷ পৰৱৰ্তী সময়ত লক ডাউন বৃদ্ধি হ’লে ল'বলগীয়া স্থিতি সন্দৰ্ভে আৰক্ষীৰ সৈতে সভাত আলোচনা কৰে চৰকাৰৰ মুখ্য সচিব কুমাৰ সঞ্জয় কৃষ্ণ আৰু আৰক্ষী সঞ্চালক প্ৰধান ভাস্কৰজ্যোতি মহন্তই ৷

ডিব্ৰুগড়,13 এপ্ৰিলঃ ৰাজ্য চৰকাৰৰ মুখ্য সচিব কুমাৰ সঞ্জয় কৃষ্ণ আৰু আৰক্ষী সঞ্চালক প্ৰধান ভাস্কৰজ্যোতি মহন্তৰ উপস্থিতিত ডিব্ৰুগড় প্ৰশাসনৰ বিষয়ববীয়া সকলৰ মাজত এক পৰ্যালোচনা বৈঠক অনুষ্ঠিত হয় । জিলা উপায়ুক্ত কাৰ্যালয়ৰ সভাগৃহত অনুষ্ঠিত সভাখনত ডিব্ৰুগড়,তিনিচুকীয়া,ধেমাজি আৰু চৰাইদেউ জিলাৰ উপায়ুক্ত আৰু আৰক্ষী অধীক্ষক সকল উপস্থিত থাকে ৷

উল্লেখ্য যে, প্ৰধানমন্ত্ৰী মোদীয়ে ঘোষণা কৰা ২১ দিনীয়া লক ডাউনৰ সময় ইতিমধ্যে সমাপ্তৰ পথত । লক ডাউন সমাপ্তিৰ পিছত যাতে জন সাধাৰণ অনাহকত বাহিৰলৈ ওলাই নাহে আৰু সামাজিক দূৰত্ব ভংগ নকৰে তাৰ প্ৰতি লক্ষ্য ৰাখি আৰক্ষী সঞ্চালক প্ৰধান গৰাকীয়ে বিশেষভাৱে জন সাধাৰণক আহ্বান জনায় । ৰাজ্যৰ আৰক্ষী বাহিনী অনাগত দিনত এইক্ষেত্ৰত যথেষ্ট কঠোৰ হ’ব বুলি জনসাধাৰণক একপ্ৰকাৰ সকীয়নি প্ৰদান কৰে আৰক্ষী সঞ্চালক প্ৰধান মহন্তই ৷

লগতে মহামাৰী কৰ’ণা ভাইৰাছৰ বাবে জাৰি কৰা লক ডাউনৰ সময়ত আৰক্ষীৰ মনোবল আৰু স্বাস্থ্য অটুট ৰখাৰ বাবে বিভিন্ন পদক্ষেপ গ্ৰহণ কৰাৰ কথা প্ৰকাশ কৰে আৰক্ষী সঞ্চালক প্ৰধান গৰাকীয়ে ৷ পৰ্যালোচনা সভাখনত অসম চৰকাৰৰ মুখ্য সচিব কুমাৰ সঞ্জয় কৃষ্ণ উপস্থিত থাকি এই সময়ছোৱাত সকলোকে সামাজিক দূৰত্ব অটুট ৰাখি নিজৰ নিৰাপত্তাৰ লগতে ঘৰ আৰু সমাজৰ নিৰাপত্তা সুনিশ্চিত কৰিবলৈ জনতাক আহ্বান জনায় ।

লগতে চাওকঃ কোভিড-19: ৰাজহুৱা স্থানত মাস্ক পৰিধান কৰাটো বাধ্যতামুলক