মৰাণ,6 জানুৱাৰী : মৰাণত বৃহস্পতিবাৰৰ পৰা আৰম্ভ হ’ব ৰাইজৰ দলৰ প্ৰথম ৰাজ্যিক অভিৱৰ্তন ৷ তিনিদিনীয়া কাৰ্যসূচীৰে অনুষ্ঠিত হ’ব এই অভিৱৰ্তন ৷ ডিব্ৰুগড়, তিনিচুকীয়া, শিৱসাগৰ আৰু চৰাইদেউ জিলা সমিতিৰ উদ্যোগত তথা মৰাণবাসী ৰাইজৰ সহযোগত অনুষ্ঠিত হ’বলগীয়া এই অভিৱৰ্তনৰ বাবে ইতিমধ্যে অভ্যৰ্থনা সমিতিয়ে পূৰ্ণ গতিত চলাইছে যাৱতীয় প্ৰস্তুতি ।
মৰাণৰ নতুন নগৰৰ আহোম পথাৰস্থিত মহাবীৰ লাচিত বৰফুকন ক্ষেত্ৰত 73 লাখ টকা ব্যয়ৰে আয়োজন কৰা এই অনুষ্ঠানটোত একেলগে দহ হাজাৰ লোকে ভোজন কৰিব পৰাকৈ ভোজনালয় নিৰ্মাণ কৰা হৈছে । অভিৱৰ্তনৰ চৌহদত চাউলুং চ্যুকাফা, ৰাঘৱ মৰাণ, কনকলতা, লাচিত বৰফুকন, মুলাগাভৰু, বাঘ হাজৰিকাকে আদি কৰি কেইবাগৰাকীও বৰেণ্য ব্যক্তিৰ প্ৰতিমূৰ্তি স্থাপনৰ কৰা হৈছে ।
অভ্যৰ্থনা সমিতিৰ বিষয়ববীয়াই জনোৱা মতে, লক্ষাধিক লোকৰ সমাগম হোৱাৰ আশাৰে নিৰ্মাণ কৰা মূল মণ্ডপৰ চৌহদত জনগোষ্ঠীয় বিশাল বাণিজ্য মেলাও অনুষ্ঠিত হ’ব । 7 জানুৱাৰীৰ পুৱাৰ ভাগত পদ্মভূষণ জাহ্নু বৰুৱাৰ পতাকা উত্তোলনেৰে কাৰ্যসূচী শুভাৰম্ভণি কৰা হ’ব ।
ইয়াৰ পাচতে শ্বহীদ তৰ্পণ, প্ৰতিনিধি পঞ্জীয়ন, প্ৰতিনিধিৰ শিবিৰ মুকলি, সতীৰ্থ সন্মিলন আৰু প্ৰতিনিধি সভা অনুষ্ঠিত হ’ব । 4 জানুৱাৰীত সামূহিক চাফাই অভিযানেৰে কাৰ্যসূচী আৰম্ভ কৰা হ’ব । পৰৱৰ্তী সময়ত বৃক্ষৰোপণ, প্ৰতিনিধি সভা আৰু বিষয় বাচনি সভা অনুষ্ঠিত হ’ব । উক্ত দিনাই দুপৰীয়া অসমৰ সাম্প্ৰতিক জাতীয় প্ৰেক্ষাপট আৰু ৰাইজৰ দলৰ ভৱিষ্যৎ কৰ্মপন্থাৰ ওপৰত অসমৰ বিভিন্ন জাতীয়-জনগোষ্ঠীয় সংগঠন আৰু বিশিষ্ট বুদ্ধিজীৱী তথা নাগৰিকৰ পৰামৰ্শ গ্ৰহণ কৰা হ’ব ।
অন্তিম দিনা সামূহিক চাফাই অভিযানৰ পাচতে বাৰেৰহণীয়া সাংস্কৃতিক শোভাযাত্ৰা উলিওৱা হ’ব । এই সাংস্কৃতিক শোভাযাত্ৰাৰ উদ্বোধক হিচাপে থাকিব জ্যেষ্ঠ অভিনেতা বিষ্ণু খাৰঘৰীয়া । বিয়লিৰ ভাগত মুকলি সভা আৰু সন্ধিয়া কৃষ্টি সন্মিলন অনুষ্ঠিত হ’ব । আনহাতে মুকলি সভাত অসমৰ কেইবাগৰাকীও বিশিষ্ট ব্যক্তিয়ে অংশগ্ৰহণ কৰিব বুলি জানিব পৰা গৈছে । আটাইকেইদিনৰ কাৰ্যসূচীত ৰাইজৰ সহযোগিতা কামনা কৰিছে অভ্যৰ্থনা সমিতিয়ে ।
লগতে পঢ়ক : দুলীয়াজান সমষ্টিৰ উন্নয়নমূলক আঁচনিসমূহৰ খতিয়ান ল'লে উপায়ুক্তই
