মৰাণ, 18 জুন: ৰাজ্যত অব্যাহত আছে ড্ৰাগছ তথা নিচা জাতীয় সামগ্ৰীৰ বিৰুদ্ধে অভিযান ৷ প্ৰতিখন জিলাৰ জিলা প্ৰশাসনে ড্ৰাগছ বিৰোধী অভিযান চলাই থকাৰ সময়তে চৰাইদেউ জিলাৰ সোণাৰিৰ নামতোলাত শুকুৰবাৰে চুলাই মদৰ বিৰুদ্ধে আৱকাৰী বিভাগ আৰু আৰক্ষী প্ৰশাসনে যৌথ অভিযান চলাই ৷ চৰাইদেউ জিলাৰ আৱকাৰী উপ-অধীক্ষক হোমেন গগৈৰ নেতৃত্বত আৰু নামতোলা আৰক্ষীৰ সহযোগত নামতোলা আৰক্ষী থানাৰ অন্তৰ্গত অশ্বিনী বিলত অবৈধ দেশীয় -বিদেশী সুৰা আৰু চুলাই মদৰ বিৰুদ্ধে যৌথ অভিযান চলাই আৰক্ষীয়ে ৷ অভিযান কালত চুলাই ঘাটিৰ পৰা অভিযানকাৰী দলটোৱে প্ৰায় 1100 লিটাৰ চুলাই মদ আৰু ৪ টা চুলাই বনোৱা যন্ত্ৰ জব্দ কৰি ঘটনাস্থলীতে চুলাইখিনি নষ্ট কৰাৰ ওপৰিও কেইবাটাও গোচৰ ৰুজু কৰে ।
উল্লেখ্য যে, জিলাৰ বিভিন্ন প্ৰান্তত লক ডাউনৰ সময়ছোৱাতে নতুনকৈ গঢ় লৈ উঠিছে বহুকেইটা চুলাই মদৰ ঘাটি ৷ আবকাৰী বিভাগৰ নিৰ্লিপ্ততাৰ সুযোগ লৈ একাংশ লোকে জিলাখনৰ অলিয়ে গলিয়ে দীৰ্ঘদিনৰ পৰা চলাই আহিছে চুলাই মদৰ ৰমৰমীয়া বেহা ৷ যি চুলাই সেৱন কৰি বহু ব্যক্তিৰ জীৱনলৈ অমানিশা নামি আহিছে সেই চুলাই মদৰ বিক্ৰী তথা সেৱনে জিলাখনত ঋণাত্মক পৰিৱেশৰ সৃষ্টি কৰাত ইয়াৰ বিৰুদ্ধে শেহতীয়াকৈ সজাগ হোৱা দেখা গৈছে ৷
লগতে পঢ়ক: দুলীয়াজানত ড্ৰাগছ ব্যৱসায়ত নামিল অধিবক্তা
ইফালে, ক'ভিড-19 সংক্ৰমণ ৰোধ কৰিবৰ বাবে সমগ্ৰ দেশ তথা ৰাজ্যত বলবৎ কৰা হৈছে লক ডাউন তথা আংশিক লক ডাউন ৷ আংশিক লক ডাউনৰ সময়ত যাতে কোনো লোকে অনাহকত আহিব নোৱাৰে তাৰ বাবে প্ৰশাসনৰ লোকে সকলো সময়তে সষ্টম হৈ থকা পৰিলক্ষিত হৈছিল যদিও একাংশ লোকে প্ৰশাসনৰ নীতি-নিয়মক বুঢ়া আঙুলি দেখুৱাই লক ডাউন অমান্য কৰি মদ-জুৱাৰ আড্ডা পতা পৰিলক্ষিত হৈছে ৷
লগতে পঢ়ক: জামুগুৰিত দুই গভাইত চোৰ আটক
